TCB ta informá

Tourism Corporation Bonaire (TCB) a kompartí informashon turístiko preliminario pa luna di aprel 2025, for di kua ta resultá ku Boneiru a risibí 18.858 bishitante stayover. Esaki ta un oumento di 14,3% kompará ku luna di aprel 2024, ora ku 16.505 bishitante a yega nos isla.

E bishitantenan for di Hulanda a forma e grupo di mas grandi, representando 39,6% di e kantidat total di yegada ku 7476 bishitante. E bishitantenan for di Merka tabata e di dos grupo mas grandi, esta 24,8% di e kantidat di yegada ku 4676 bishitante.

Dia di Rincon a hunga un ròl signifikativo den atrae mas bishitante for di Kòrsou i Aruba.

En total 3112 bishitante (16,5%) for di Kòrsou a bishitá nos isla, siguí pa Aruba ku 610 bishitante (3,2%), Canada ku 600 bishitante (3,2%), Alemania ku 518 bishitante (2,7%),Bélgika ku 448 bishitante (2,4%), Suisa ku 215 bishitante (1,1%), Colombia ku 154 bishitante (0,8%) i Reino Uní ku 142 (0,8%).

Mayoria di e bishitantenan merikano a biaha huntu ku un partner, siguí pa e bishitantenan ku ta biaha nan so. Mayoria a bini pa vakansi (53,7%), sambuyamentu (32,8%). Mayoria di nan a hospedá den un hotèl (49,7%), un vila (14,5%), un apartamento (7,2%), na propio bibienda (6,2%) òf serka un miembro di famia (4,5%). E bishitantenan merikano a bini prinsipalmente for di New York, California, Florida, Texas i North Carolina. E repartishon di edat ta mustra ku e biaheronan di 55 pa 64 aña a representá 22,6% di e bishitantenan i e biaheronan di 45 te 65 aña: 20,8%.

Mayoria di e bishitantenan hulandes a biaha huntu ku un partner i despues ta sigui e bishitantenan ku ta biaha nan so. Mayoria bishitante a bini pa vakansi (71,4%) i pa bishitá amigu i famia (10,6%). Mayoria di e bishitantenan a hospedá den un hotèl (47,8%), siguí pa un apartamento (12,2%), den un vila (10,7%), serka un miembro di famia (8,4%), i den nan propio bibienda (4,7%). Mayoria di e bishitantenan hulandes a bini for di Zuid-Holland, Noord-Holland, Noord-Brabant, Gelderland i Utrecht, kaminda e grupo di edat di 45 pa 54 aña (18,7%) i e grupo di edat di 55 pa 64 aña (18,1%) a forma e segmentonan di mas grandi.

Pa mas informashon tokante Boneiru su prestashonnan turístiko, bo por bishitá www.bonaireisland.com òf tuma kontakto ku nos via email na info@bonaireisland.com.