Diabierna 6 di mei 2022, rondona pa colega y amistadnan, a celebra e carera di mas di 30 aña di sr. David Geerman den servicio di gobierno di Aruba. Despues di un carera largo, awo a yega momento cu Sr. Geerman ta bai baha cu pensioen, uno cu siguramente ela merece!
Pa hopi e tabata mas cu djis un colega, e tabata un amigo, cu sigur lo haci falta den e oficina di Departamento di Transporte Publico. Minister di Transporte suplente, sr. Geoffrey Wever tabata t’ey presente pa haci entrega di un homenahe na Sr. Geerman, y tambe felicit’e riba e proximo etapa den su bida.
Di parti di Minister di Transporte, sr. Ursell Arends, cu lastimamente pa motibo di salud no por tabata presente na e celebracion, ta felicita sr. Geerman pa celebracion di su 32 aniversario na DTP, y alabes ta manda un palabra di gradicimento pa su servicio pa Land Aruba. E deseo ta pa sr. Geerman por goza di e temporada di pensioen den forma activo y den compania di su sernan keri yena cu felicidad.
