Ruthy Vrieswijk
Pa via di e remetido aki, mi kier hala atencion públicamente riba e falta di respet y e tardansa inhusto cu tin actualmente den e departamento di keho (Klachtencommissie) di Horacio Oduber Hospital (HOH). Ya a pasa basta luna desde cu a hiba a cabo un hoorzitting oficial riba 15 di januari 2026, y te cu e dia di awe, e comicion structuralmente no a manda e carta cu e resultado oficial di e sesion aki.
Esaki no ta djis un fayo administrativo, sino un falta di respet grandi pa cu e ciudadanonan y specialmente pa nos grandinan, kendenan mi tin como lema principal pa mantene debidamente informa. Despues di a exigi un contesta y trece mi inkietud dilanti, mi a ricibi un reakcion di parti di e personal di Calidad y Siguridad di HOH. Den e contesta aki, nan ta pidi disculpa pa e tardansa y ta admiti abiertamente cu e comicion tin un retraso masha grandi den tratamentu di keho y den elaboracion di e decisionnan (beschikking).
Segun e informacion cu nan a brinda mi, e beschikking a wordo traha caba y actualmente e ta den un proceso di revision. Unabes cu e revision aki keda cla, esaki lo wordo manda pa e Hunta di Polisa (RvB) pa nan por tuma un decision final y asina contracta mi persona.
Sinembargo, e realidad aki ta lanta un preocupacion hopi mas grandi den mi persona y den Comunidad. Si HOH no por maneha ni handles nan propio oficinanan di keho debidamente, y si nan no por keda cla ni cu nan mesun trabaunan interno structural, con nan ta pretende di kier funciona cu e fusion cu IMSAN? Ta logicamente imposibel pa handle un structura mas grandi si bo mesun base ta den un atraso structural asina grandi.
E situacion aki ta birando algo masha fastioso, un proceso demasiado largo y laf, caminda e retraso ta wordo uza structuralmente como un excuus. Prensa di HOH por a purba di menasa mi den pasado pa mi stop di skirbi, pero mi kier laga bon cla cu mi a stop temporalmente únicamente pa via di otro compromisonan personal, y no pasobra mi tin temor. Pa algun hende, placa por ta e unico lema, pero pa mi, e bienestar y e derechonan di nos grandinan ta bini na prome lugar.
Mi ta spera cu, structuralmente, e comicion aki y e directiva di HOH asumi nan responsabilidad y duna mi e contesta y e claridad cu mi tin derecho riba dje pa via legal mas pronto posibel.