Durante varios aña, conflicto creciente riba uzo di nos beach nan na Aruba ta genera preocupacion den comunidad local. Aunke e ley ta bisa claramente cu e prome 10 meter for di lama ta propiedad publico, hopi hotel y restaurant riba beach ta comporta como si e parti aki ta di nan mes.
Mediante palapa, stoel di beach y area “reservá”, e establecimento nan ta limita acceso di publico y, den hopi caso, ta cobra pa uzo di esaki. Esaki no solamente ta pone pregunta legal, pero tambe ta pone un duda moral riba respeta pa nos espacio publico.
E situacion aki no ta nobo. Ya pa mas cu un decada tin keho cu ta bolbe bolbe tocante cobramento pa palapa riba beach publico , algo cu, segun ley, no ta permiti. Si hotel y restaurant nan ta cobra pa esaki, e placa aki ta bay realmente na caha di gobierno? Si no, nos por papia di un uzo indebido di nos propiedad publico?.
Banda di aspecto legal, tin un problema social mas profundo. Hopi Arubiano ta sinti cu nan ta wordo trapa na nan mes tera. Playa nan cu antes tabata accesibel pa tur hende, awe ta parce mas bien exclusivo pa turista. Autoridadnan y gobierno, luga di proteha su ciudadano nan, ta keda pasivo mientras e practica nan aki ta sigui sin control.
E situacion aki no ta limita solamente na Aruba. Na Corsou tin problema similar, unda hotelnan a trata di restringi acceso di localnan pa nan propio playa. Esaki a provoca protesta y malestar, paso hopi Curasoleño ta sinti cu nan ta wordo desrespeta riba nan mes isla.
Na Boneiro tambe tin experiencia parecido. Den pasado, STINAPA a trata di introduci cobransa pa uzo di beach, algo cu a bira un problema nacional y politico. Aunke e plan aki a wordo para, tin temor cu inversionista stranhero lo sigui busca manera pa privatisa nos costa nan. Esaki simplemente ta un falta di respet pa cuidadano nan di e isla riba nan propio PAIS
E pregunta importante ta: Arubiano, Boneriano of Curasoleño por haci e mescos na Hulanda, Merca of Spaña? Lo nan por simplemente tuma control di propiedad publico y kibra localnan? E respuesta ta claramente no, paso e gobierno na e Pais nan grandi nan ey ta percura pa nan pueblo y tur inmigrante y tur inversionista mester respeta nan ciudadano nan y regla y leynan di e Pais, nos por bisa mes un cos aki na Aruba ?
Tambe Parlamento ta desfuncional , no ta mira ni un iniciativa di ley pa proteha Aruba riba su naturalesa, riba posibel negoshinan na caminda , pero ta mira un minister Geoffrey Wever ta bula bay tur Pais pa Trademicion sin cu ley nan den cas ta regla prome cu bin haci un desaster aki na Aruba, Aruba ta bon bezig ?
Recientemente na Aruba, un turista a nenga di paga pa un palapa riba un beach publico, poniendo e problema aki bek riba mesa. Curiosamente, no tabata un local cu a destapa e situacion, pero un bishitante.
Gobiernonan ta consciente di loke ta pasa, pero nan no ta tuma accion firme. Esaki ta no solamente un berguensa pa nos pais, pero tambe un menasa pa nos soberania cultural y social. Pa basta aña diferente localnan cu ta biba riba e isla aki a manifesta riba e groseria aki cu ta tumando luga pa aña nan largo
Mientras e situacion ta sigui asina, Arubiano ta perde poco poco nan derecho riba nan mes playa. Un espacio cu semper tabata di comunidad ta bira cada bes mas comercial y exclusivo.
E ora a yega pa gobierno y instancia nan actua, proteha nos beach publico y garantisa cu ley ta wordo respeta no solamente pa turista, pero principalmente pa nos propio pueblo, paso aki ta e unico caminda cu e localnan tin pa saca nan stress y of kier dies desconecta di tur e situacionnan , problema mental, tristesa cu tin riba e isla.