Diadomingo ultimo un atake of suceso di tension a tuma luga den e bario di De Vuyst, unda cu tiro a resona y a lanta preocupacion grandi den e comunidad local. Polis a reacciona di biaha pa persigui un brommer sospechoso den e area patras di Scol di Polis.
Durante e persecucion, e sospechoso a purba huy pa Polis, pero den su careda di desesperacion el a perde control, a dal abou y a cay fo’i e vehiculo. Den e caos di e momento, e sospechoso a scapa na pia drentando den e mondi cercano, laga su slof, scooter y un arma di candela atras na e sitio di e suceso.
Autoridadnan a cera e area mesora y a inicia un buskeda intensivo den e mondi pa purba localisa e sospechoso, tambe polis a tuma e evidencia cu a keda atras pa investigacion forensio.
Pueblo ta fada di e ola di violencia
E suceso aki ta subraya un problema cu ta keda crece den nos comunidad: e cantidad creciente di arma di candela riba e casnan y e incidentenan di tiramento cu ta pone e siguridad di tur ciudadano den peliger. E habitantenan di e bario y di Aruba en general ta expresa cu nan ta completamente fada di e situacion aki.
Cada dia ta mas arma y mas tiramento riba nos cayanan,” un residente a expresa. Pueblo ta pidi pa accion mas severo y pa e autoridadnan tuma medida drastico pa kita e armanan ilicito aki for di e cayanan premirando cu e trankilidad y pas drenta bek den e barionan.
E caso ta keda bou investigacion activo di Polis. Autoridadnan ta haci un yamada na e comunidad pa cualkier persona cu tin informacion cu por yuda den e investigacion aki, tuma contacto cu Polis di biaha.