Den cuadro di e lansamento di Centro Pashent di Aruba, e Minister di Salud Publico Mervin Wyatt Ras a elabora riba e esfuersonan continuo di gobierno pa restructura e sistema di cuido, reduci listanan di espera y reforsa e canalnan unda ciudadanonan por canalisa nan inkietud y kehonan.
Accionnan Concreto pa Mehora e Sistema di Cuido
E mandatario a resalta varios paso clave cu a wordo tuma pa eleva e calidad y accesibilidad di e servicio di salud na Aruba:
Protocol di Referencia di Doctor di Cas pa Specialista: A firma protocolnan formal entre e organisacion di dokternan di cas (HAVA) y e specialistanan pa percura cu e proceso di referencia ta mas eficiente, combatiendo directamente e listanan largo di espera.
Fortalecemento di IVA y Proteccion pa Adulto Mayor: A duna mas recurso financiero na Inspectie Volksgezondheid Aruba (IVA) pa amplia su personal. Den e cuadro aki, a crea un departamento dedica na atende cu kehonan y protege e derechonan di e adultonan mayor.
Canalisa Keho y Transparencia: Ora un persona haya un problema na hospital of den cuido, e por wordo guia pa IVA, of atende e asunto via e Ombudsman di Aruba.
Comparando e rol di e plataforma nobo cu e dinamica entre Gobierno y Parlamento, e Minister a splica cu un organisacion independiente di pashent ta esencial pa tene e proveedornan di cuido y e instancianan estatal “scherp” y alerta.
“E ta mescos cu gobierno: nos ta gobierno, pero bo tin parlamento cu continuamente ta cuestiona bo y haci pregunta. Esey ta tene bo scherp y ta haci cu bo tin cu mehora. Un body asina di pashent uní lo haci e mesun trabou, mustrando unda cos no ta bay bon pa nos por hacie miho.”
E mandatario a conclui cu maske e dialogo directo y e instancianan existente ta e prome paso, e existencia di Centro Pashent di Aruba ta bay sirbi como un respaldo clave pa haci e siguimento (follow up) necesario, garantisando cu tur entidad ta cumpli cu nan deber y cu e pashent ta ricibi e miho cuido posibel.