Parlamentario Eduard Pieters: “Gobierno ta basa su decision riba un rapport cu Parlamento mes no a mira. Unda e transparencia ta?”

Ta remarcabel cu Gobierno ta keda referi na un rapport economico pa sostene su posicion
tocante aumento di salario minimo. Pero segun parlamentario Eduard Pieters (PPA),
Parlamento di Aruba ainda no a ricibi e famoso documento aki, cu mester permiti un evaluacion
independiente di e decision. Durante conferencia di prensa, Pieters a cuestiona e falta di
informacion y a pone enfasis riba responsabilidad di Gobierno pa rindi cuenta na Parlamento.
“Si tin un estudio, presenta e estudio”
Pieters a menciona un rapport economico cu, segun su declaracion, Gobierno a encarga na
Economisch Bureau van Amsterdam. E ta cuestiona pakico e documento ainda no a wordo
comparti cu Parlamento, a pesar cu ta mencion’e den debate publico. “Con nos por evalua un
plan, si nos no conoce e analisis, e recomendacionnan y e posibel consecuencianan?”
Pa Pieters, un referencia general na un estudio no ta suficiente pa uza como fundeshi pa un
decision economico di tal magnitud.
Parlamento no por controla sin informacion
Como miembro di Parlamento, Pieters ta considera esencial cu e representantenan di pueblo
haya acceso na e documentacion relevante. E ta sostene cu Parlamento mester por examina e
supuesto scenarionan alternativo y posibel efecto riba e trahadornan y e empresanan.
“Gobierno no por pidi confiansa, mientras falta e informacion necesario pa controla su
decision!”
“Unda ta e plan di implementacion?”
Pieters ta cuestiona tambe si tin un plan suficientemente detaya pa implementa e aumento.
Segun Pieters, e debate mester inclui e forma di implementacion, consulta cu stakeholders y
evaluacion di riesgo economico. Pa PPA, e existencia di un rapport no ta reemplaza e obligacion
di Gobierno, pa splica su decisionnan.
Transparencia no ta un fabor pa Parlamento
Pieters ta enfatisa cu PPA ta respalda aumento responsabel di salario minimo, pero ta exigi pa e
proceso ta transparente y verificabel. “Nos no ta pidi informacion pa atrasa un decision. Nos ta
pidi informacion pa por cumpli cu nos responsabilidad como Parlamento.”
E pregunta cu Pieters ta pone ta simpel: si Gobierno ta convenci cu su decision tin base
economico solido, pakico Parlamento ainda no tin e documentonan necesario pa evalua esey
tambe?