Riba Dia Internacional di Adulto Mayor, Minister di Salubridad Publico,
Asunto Social, Cuido di Adulto Mayor y Maneho di Adiccion, hunto cu National Climate
Resilience Council (NCRC), Directie Ouderenzaken (DOZ) y Directie Volksgezondheid
(DVG), a introduci oficialmente e Maneho di Calor pa casnan di cuido. Dia Internacional di
Adulto Mayor ta wordo conmemora tur aña riba 1 di oktober y ta pone atencion riba
bienestar, dignidad y participacion di adultonan mayor den sociedad.
E Maneho di Calor tin como meta pa preveni efectonan negativo di calor riba salud y
bienestar di adultonan mayor y pa yuda casnan di cuido prepara y actua na tempo durante
periodonan di calor intenso.
Adultonan mayor ta mas vulnerabel pa efectonan di calor. Cu edad, e curpa ta regula
temperatura menos facilmente, mientras condicionnan cronico y uzo di cierto medicamento
por aumenta e riesgo pa complicacionnan di salud. Pa e motibo aki, prevencion y accion na
tempo ta esencial.
E Maneho di Calor ta resultado di cooperacion entre DOZ, DVG, Departamento
Meteorologico Aruba (DMA), NCRC, International Panel on Deltas and Coastal Areas
(IPDC), Impact Blue Foundation y Climate Adaptation Services (CAS).
Como parti di e maneho, casnan di cuido lo haya stacionnan meteorologico pa monitorea
temperatura y humedad. Cu financiamento di IPDC, e stacionnan lo wordo poni
gratuitamente na disposicion di e institucionnan, mientras e data genera lo wordo comparti
directamente cu DMA.
Ora e hitte-index ta indica di yega of pasa e limite determina durante varios dia consecutivo,
DMA y DOZ lo manda un advertencia na casnan di cuido pa e Protocol di Calor por drenta
na vigor.
Pa sostene e personal di cuido, a desaroya material informativo cu señalnan di stress debi na
calor, agotamento debi na calor y ataka di calor, como tambe indicacionnan practico pa
reconoce riesgo y actua na tempo.
Pa e Minister, e Maneho di Calor ta un paso importante pa sigui fortalece prevencion y
calidad den cuido, cu salud, seguridad y dignidad di adultonan mayor como punto central.
E Maneho di Calor ta dirigi inicialmente na casnan di cuido pa adultonan mayor. E intencion
ta cu den futuro por amplia e maneho pa inclui otro localidadnan y areanan publico cu ta
wordo bishita pa adultonan mayor.
Cu e maneho aki, Gobierno y e diferente partnernan ta pone un base mas structura pa proteha
salud, seguridad y bienestar di nos adultonan mayor.