Sint Maarten

Oficina di simpson Bay lagoon Authority ta habri oficina temporal na e Ferry Dock entrante dialuna 9 di november

Simpson Bay Lagoen

Port St. Maarten Group (PSG) ta anuncia cu e oficina y servicionan pa publico di Simpson Bay Lagoon Authority Corporation (SLAC) lo ta operacional entrante dialuna, 9 di november 2026, na e Ferry Dock frente na e tereno di stacionamento di Princess Juliana International Airport (PJIA). Esaki ta parti di un meyoramento temporal relaciona cu e trabounan di renobacion cu ta tumando luga na e dock di Simpson Bay. Servicionan di Inmigracion tambe ta ubica na e mesun sitio aki.

E horarionan di servicio standard ta di 8:00 a.m. pa 12:00 p.m. (cera pa merdia di 12:00 p.m. pa 1:00 p.m.), y ta reabri di 1:00 p.m. pa 4:30 p.m. (pa atencion na cliente), te cu 5:00 p.m. (cierre di oficina). E horarionan pa fin di siman ta di 8:00 a.m. pa 4:30 p.m.

E mudansa aki ta sigi despues di e cierre di e dock di Simpson Bay dia 7 di oktober 2026, pa asina facilita trabounan di reconstruccion y meyoramento extensivo na e facilidadnan maritimo existente.

E meyoramentonan temporal aki tin como meta pa sigura e continuidad di e servicionan esencial pa e comunidad maritimo y di yate mientras cu e trabounan di construccion ta andando.

Ta conseha doñonan di yate, capitan, operador di barco, agente di yate, representante di marina y demas personan di interes cu mester di asistencia di SLAC pa tuma nota di e mudansa aki y haci e areglonan di mas necesario ora di haci uso di e servicionan.

E Simpson Bay Lagoon ta un centro hopi importante pa e industria di yate na Sint Maarten, acomodando barconan recreativo, yatenan di lujo y mega yatenan, miéntras e ta apoya marinanan, provedor di servicio maritimo y hopi otro negoshinan relaciona cu e sector di turismo maritimo.

PSG ta reconoce e importancia di mantene servicionan di facil acceso y eficiente pa e comunidad maritimo, di forma especial awor cu Sint Maarten ta yagando e temporada halto tradicional di yatenan den Caribe.

Port St. Maarten Group ta gradici e comunidad maritimo pa nan comprension y cooperacion durante e periodo di mudansa aki.

Related posts

Diez hoben a termina nan estudio di Kustwacht (BOK)

EA News Author

Minister Plenipotenciario Arrindell ta duna inicio na un proyecto di asercamento pa studiantenan (Student Engagement Outreach)

EA News Author

A aresta Curasoleño na Dubai pa likidacion

EA News Author

Leave a Comment

Whatsapp Message