Directiva di Comerciantenan Uni Aruba (CUA), encabesa pa su presidente Frans Ponson, a manda un comunicado di urgencia pa tur su miembronan tocante e intencion di Gobierno di Aruba pa aumenta e Sueldo Minimo y hiba esaki na e nivel di Bestaansminimum entrante dia prome di Januari 2027.
Preocupacion pa falta di estudio di e efecto economico
Directiva di CUA a expresa su preocupacion pa cu e aumento aki. Segun e organisacion, te cu e momento aki Gobierno no a realisa ningun estudio di impacto pa evalua e efectonan cu e decision aki lo tin riba e economia local.
Entre e puntonan di mas gran preocupacion cu ta wordo resalta tin:
- Efectonan di inflacion: E risico cu un aumento salarial lo por causa un subida generalisa den prijsnan di producto y servicio.
- Posicion competitivo den region: E impacto cu esaki por tin riba e competitividad di Aruba compara cu otro paisnan den region.
- Impacto riba empresanan chikito: E presion financiero adicional cu esaki lo trece pa e comerciantenan y empresanan chikito.
Reunion extraordinario pa miembronan di CUA
Cu e meta pa intercambia di opinion, trece preocupacionnan dilanti y fiha un posicion unico y firme como organisacion, Directiva di CUA ta yama tur su miembronan pa un reunion extraordinario:
- Fecha: Diaranson, 7 di Oktober
- Hora: 11:00 di mainta
- Lugar: IMAX den Gloria Aruba Mall
Condicion di participacion
E reunion aki ta unicamente pa miembro di CUA. Pa motibo di e caracter di urgencia y pa facilita e organisacion, Directiva ta solicita pa cada compania participa cu un maximo di un (1) representante.