Aruba Airport Authority N.V. (AAA) ta orguyoso di anuncia e lansamento di su Relato Anual pa aña 2024, cu ta demostra e progreso continuo di e organisacion pa excelencia operacional, sostenibilidad y su rol como un contribuyente vital na economia y comunidad di Aruba.
Na aña 2024, AAA a reafirma su vision di bira un aeropuerto lider den Caribe, comprometi na entrega servicio excepcional y fomenta crecemento sostenibel pa Aruba. Guia pa cuater pilar strategico: excelencia operacional, experiencia di cliente, sostenibilidad y compromiso cu comunidad, nos a tuma pasonan significativo pa alinia nos operacionnan cu obhetivonan a largo plaso y expectativanan di stakeholders.
E Relato Anual di e aña aki ta mantene e formato mehora introduci na aña 2023, ofreciendo un relato mas eficiente y transparente di nos logronan y direccion strategico. E acercamento aki ta enfatisa e compromiso di AAA cu responsabilidad, transparencia y confiansa di stakeholder.
Algun di e punto clave di 2024, e aña mas ocupa te ainda den historia di e aeropuerto, tabata:
- Mas cu 3.2 miyon pasahero a biaha pa y for di Aeropuerto di Aruba, representando un aumento di 14% aña tras aña y solidificando mas ainda nos posicion como un porta regional clave.
- Aeropuerto di Aruba a sirbi 25 aerolinea y mas di 45 ruta directo, incluyendo destinacionnan nobo y partnernan nobo di aerolinea, ampliando e conexion global di Aruba.
- Satisfaccion di pasahero a keda halto cu score di experiencia yegando 4.11 y 3.98 respectivamente (riba un escala di 5 punto) demostrando nos enfoke consistente riba calidad y servicio.
Retonan clave na aña 2024 a inclui preparacion pa e audit di recertificacion di DCAA bou di e ley nobo di aviacion di AUA-AGA y atende e resultadonan di e audit di aña 2023 a traves di diferente Corrective Action Plans. Adicionalmente, un fayo di sistema di HVAC na augustus a conduci cu mester a cera aeropuerto pa un dia, loke a impulsa e desaroyo di plannan robusto di Business Continuity y mantencion pa preveni interupcion den futuro.
Durante henter aña 2024, e teamnan di AAA a traha diligentemente den colaboracion estrecho cu Project Management Office (PMO) y varios subcontratista di e proyecto Gateway 2030 pa garantisa e finalisacion exitoso di Fase 1A. Nan esfuersonan colectivo a posiciona e proyecto pa bira completamente operacional na aña 2025.
AAA a mantene e Green Globe Certification y a logra mantene e acreditacion di nivel 3 den e programa di ACI Airport Carbon Accreditation, reforsando nos compromiso pa operacionnan di un aeropuerto sostenibel.
Den nos di dos aña completo di operacionnan interno di Aviacion General (FBO), nos a logra logronan operacional y di servicio cu a pone un punto di referencia nobo pa servicio di aviacion priva na Aeropuerto di Aruba.
Team di Maneho Interino di AAA a expresa: “Reflexionando riba aña 2024, nos ta orguyoso di loke nos team y stakeholders a logra hunto. E logronan aki ta un testimonio di nos compromiso colectivo cu excelencia, sostenibilidad y impacto den comunidad. Nos gratitud sincero ta bay na tur miembro di team di AAA y nos partnernan den e ecosistema di aviacion y turismo, nos ta sigui nos trayecto y keda firme den nos meta pa posiciona Aeropuerto di Aruba como aeropuerto lider den Caribe”.
Hunto cu e Relato Anual, AAA a publica e Environmental, Social and Governance (ESG) Corporate Social Responsibility (CSR) di aña 2024, cu ta bay mas profundo den nos iniciativanan di sostenibilidad, envolvimento di comunidad y practicanan etico di negoshi.
Nos ta invita tur stakeholder, partner y miembro di e comunidad di Aruba pa explora tanto e Relato Anual como e Relato di CSR 2024, disponibel awo na: https://www.airportaruba.com/annual-reports
Tocante Aeropuerto di Aruba
AUA Airport ta un di e aeropuertonan mas ocupa den region Caribe, cu mas di 25 diferente aerolinea operando na Aruba contribuyendo na mas cu 3.2 miyon pasahero pa aña y brindando servicio aereo na 31 pais y 45 destinacion non-stop rond mundo. Di e mercadonan cu AUA Airport ta brinda servicio na dje, 77% ta di Merca y Canada, 15% ta di Latino America, 4% ta di Europa y 4% ta di Caribe Hulandes. AUA Airport ta reconoce cu esaki ta danki na un economia stabiel, clima politico, hospitalidad, populacion diversifica y siguridad general di nos isla. AUA Airport su aspiracion ta pa converti den un di e aeropuertonan mas sostenibel, sigur y prepara pa futuro den e region di Latino America y Caribe, brindando un espacio laboral confiabel, cu e instalacionnan moderno y ademas cu un excelente servicio n’e cliente p’asina por refleha e hospitalidad di Aruba, contribuyendo na un futuro prospero pa Aruba.
Haya sa mas di loke ta sosode na AUA Airport door di bishita www.airportaruba.com y conecta cu AUA Airport riba Twitter.com/Aruba_Airport, Facebook.com/ArubaAirport, Instagram.com/arubaairport, TikTok.com/@arubaairport y Linkedin.com/ArubaAirport.