Parlamentario David Seferina di fraccion di MFK a dirigi pregunta na Minister di Desaroyo Economico tocante siguridad na playanan di Curaçao. E preguntanan ta bini despues di diferente noticia den ultimo tempo di turista cu lamentablemente a perde nan bida den lama na nos playanan.
Segun sr. Seferina, cada un di e situacionnan aki ta un tragedia pa e famianan envolvi. Na mes momento, nan ta mustra e importancianan pa sigui wak con Curaçao por haci su playanan mas sigur, tanto pa turista como pa nos mesun habitantenan.
“Nos playanan ta hopi importante pa nos turismo, pero prome cu tur cos, nos ta papia di siguridad y bida di hende. Pesey nos mester wak kico mas nos por haci pa preveni accidente y pa yudansa por ta disponibel mas liher ora algo pasa,” sr. Seferina ta indica.
Den e cuadro aki, sr. Seferina ta referi na un acuerdo di cooperacion entre Curaçao Tourist Board y Blauwe Kruis pa mehora yudansa medico den caso di emergencia na playanan. E parlamentario ta pidi mas claridad tocante kico e acuerdo aki ta contene, cua responsabilidad cada partido tin y kico un persona por spera concretamente ora tin un emergencia na playa.
Un otro punto cu sr. Seferina ta pone dilanti ta informacion na playanan. Segun e parlamentario, mester wak si tin suficiente borchi cla y visibel cu advertencia tocante coriente y condicion di lama, instruccion tocante kico haci ora un persona ta den problema, y numbernan cu turista y habitantenan por yama den caso di emergencia.
Sr. Seferina ta pidi Gobierno tambe pa evalua e posibilidad di tin lifeguards profesional na e playanan cu ta ricibi mas bishitante. Ademas, e kier sa si na nos playanan tin salbabida of otro ekipamento di rescate disponibel cu por wordo uza rapidamente ora un persona ta den problema den lama. Si esaki no ta e caso, e ta pidi Gobierno pa evalua con e tipo di ekipamentonan aki por wordo instala.
Finalmente, sr. Seferina kier sa si Gobierno tin un plan integral di beach safety pa Curaçao. Segun e parlamentario, siguridad na playa no mester depende solamente di e manera cu ta reacciona despues cu un accidente a sosode. Prevencion mester forma un parti importante di e maneho tambe.
“Cu e preguntanan aki nos no kier crea preocupacion. E intencion ta hustamente pa pone enfasis riba prevencion y pa wak con nos por tuma medida na tempo. Ora un emergencia sosode, mester ta cla kende ta actua, con yudansa ta yega y cua ekipamento tin disponibel. Pero na mes momento nos mester haci tur loke ta razonablemente posible pa preveni cu un situacion grave sosode,” asina sr. Seferina ta indica.
Seferina ta enfatisa cu siguridad na playa no ta solamente un asunto di turismo. E ta trata tambe di proteha bida humano y di mantene confianza den Curaçao como un destinacion caminda tanto bishitante como habitante por haci uzo di nos playanan cu mas siguridad.