Mas cu 20 aña Centro Patriotico di PPA na San Nicolas a keda den deterioro. PPA mes a pasa
alrededor di dos decada sin representacion den Parlamento. Awor, despues di su regreso den
Parlamento, e partido ta reconstruyendo su centro. Pa parlamentario Eduard Pieters, e
paralelismo tin un significado politico cla: PPA a bolbe pa construi. “Awe, den forma simbolico,
nos ta reconstruyendo Centro Patriotico. Y mañan, cu Dios su poder y pueblo su boluntad, nos
lo reconstrui pais aki bek.”
Un centro pa acerca pueblo na politica
Segun Pieters, trabou pa recupera Centro Patriotico a cuminsa despues di eleccion 2024 ora
PPA a logra e votonan necesario pa bolbe den Parlamento despues di 20 aña.
E meta no ta solamente renoba un edificio. PPA kier crea un espacio, caminda ciudadano por
acerca partido, haya informacion, conoce su representantenan y su candidatonan.
Y aunke e centro ta na San Nicolas, Pieters ta enfatisa cu su funcion lo ta pa henter Aruba.
“Nos mester di un centro caminda nos por duna informacion na nos sostenedornan, pero
tambe na pueblo di Aruba.”
Mike de Meza: porta habri, pero no tin decision
Durante conferencia di prensa, Pieters a haya e pregunta tambe tocante speculacion riba un
posibel regreso di sr. Mike de Meza, kende a cuminsa su carera politico den PPA. Pieters no a
anuncia ningun regreso, pero si el a expresa cu: “E opcionnan semper ta keda habri.”
Pero tambe el a enfatisa cu e invitacion aki ta hopi mas amplio cu djis pa un solo persona.
“E invitacion aki no ta conta solamente pa Mike de Meza. Esaki ta pa tur hende cu kier bin
traha, yuda pais Aruba y defende e pida baranca aki, ta bonbini den PPA.”
Pa Pieters, PPA tin un legado y trayectoria den desaroyo di Aruba, pero awor e partido ta mira
dilanti: pa fortalece su organizacion, sigui crece y reuni hende cu kier contribui.
Di reconstruccion di un edificio pa reconstruccion di pais
Centro Patriotico, pues, ta bira mas cu cement y bloki. Tabata trata di un edificio cu tabata den
deterioro y awor ta lanta bek. Un partido cu tabata pafor di Parlamento durante dos decada y a
bolbe. Y segun Pieters, e siguiente paso ta transforma e regreso ey den trabou.
“Awe nos ta reconstrui Centro Patriotico. Mañan, cu poder di Dios, pueblo su boluntad y
sosten, nos lo reconstrui pais Aruba bek,” Eduard Pieters a finalisa bisando.