Mester bini ku pakete di alivio pa pueblo
Partido MAN a tuma nota di e anunsio di oumento di preis di gasolin i disel pa 29 sèptèmber awor sigui pa dia 1 di òktober k’un oumento drastiko di preis di awa ku 71 sèn i koriente.
Pa MAN e anunsio aki ta un sla duru pa tur kas di famia kaminda den un tiru ta konose oumento di gasolin, disel, awa i koriente. E nesesidatnan basiko pa un kas ta birando mas karu i e pòtmòni ta birando mas chiki.
Pobresa
Esun pober manera e adultonan mayo ku ta kobra solamente AOV i kobradó di onderstant ta bira más pober i no por ni sobrebibi más.
Klase medio
E klase medio, esta e dosente, e trahadó den kuido, etc. tiki tiki ta kai den pobresa.
Nos ta konsiente di e desaroyonan mundial. Pero esei no ta kita ku Gobièrnu tin un responsabilidat pa duna pueblo alivio di un oumento drastiko di kosto di bida.
Kosto di bida mas haltu
E oumento aki ta nifika un influensia negativo riba kosto di bida. Bida lo bira mas karu pa tur kas di famia. Kuminda, un nesesidat di tur hende, lo bira mas karu banda di awa, koriente i gasolin ku tambe ta esensial den bida di tur dia.
Ya kaba CBS a mustra ku hopi kas di famia tin problema finansiero pa kumpli ku nan gastunan basiko i ku klase medio den nos pais ta birando mas pober dia pa dia.
Manera nos di MAN ya a yega di propone den pasado, nos ta bolbe hasi un yamada na Gabinete Pisas pa bin parlamento i pasa un pakete di alivio pa henter pueblo di Kòrsou.
Proposishonnan pa Alivio:
Pa mantene pueblo su forsa di kompra
Kompensashon pa kasnan bou di sierto límite di entrada.
Karchi pa kumpra kuminda, energia i transporte públiko pa esnan mas vulnerabel.
Baha e ganashi èkstra di OB riba gasolin, diesel, flete i seguro riba flete.
Atvertensia
E oumento di kosto bida aki ta un sla duru pa tur kas di famia i komersio i nos no por sinta ketu laga e oumento aki krea dolo!