Awe mainta tratamento di un caso penal a bay masha liher pero cu consecuencia serio pa e dama E.G.
Por a compronde cu luna pasa Hues Comisario a laga E.G. bay liber door cu e ta 5 luna na estado y pendiente e caso penal contra dje pa exportacion di 600 gram di cocaina. Awe mainta e no a presenta y mirando e hecho cu e dama lo ta ariba caya ta droga, Hues a condena E.G. na castigo di prison y detencion di biaha.
Hues a cuestiona e situacion aki, caminda ningun instancia no kier atende cu e dama. Ta asina cu tin ley cu ta mustra cu por obliga un persona haya rehabilitacion pero no tin un lugar/instancia estableci door di Gobierno caminda esey por tuma lugar.
DAMA A EXPORTA COCAINA
E dama E.G. (29) ta wordo acusa cu riba 13 Mei 2026 el a exporta cocaina. Ta asina cu E.G. no a presenta den Corte, mientras cu su abogado y su mama si tabata presente. Tambe tabata presente un empleado di Reclasering. Door cu E.G. a wordo laga liber for di KIA, e ta riba caya ta keto bay den adiccion y na estado.
Por a compronde cu na Mei, E.G. lo a hiba 3 caha di pieza cu el a haya di un tal Rasta pa manda Hulanda via Postkantoor. A resulta cu den e cahanan tabatin cocaina scondi. En total a confisca 600 gram di cocaina. A detene E.G. y door cu e ta na estado, luna pasa el a wordo laga liber.
NINGUN AYUDO DI INSTANCIANAN
Hues a mustra cu tin raport di Reclasering cu ta mustra cu E.G. no a presenta na Reclasering pa haya ayudo manera a palabra. Parce cu ningun instancia no kier tuma E.G. pa yud’e rehabilita y atende su e yiu cu dentro di poco lo nace, pa motibo di su comportacion na instancianan den pasado, caminda e no kier atene su mes na regla.
Voogdijraad tambe ta al tanto di e caso y lo atende cu e mucha ora cu e nace.
Hues a remarca cu E.G. ta un adicto y mester di ayudo pero ningun hende kier yuda. Hues a puntra, kende lo bay yuda? Hues a remarca cu posiblemente e yiu di E.G. tambe lo nace adicto! Hues a scucha e miembro Reclasering como testigo tocante E.G. pa asina mira con ta bay haci cu E.G. cu no ta localisabel.
E miembro di Reclasering a bisa Hues cu e mama di E.G. a splica e situacion cu e tin na su cas dos di e tres yiu menor di edad y cu limitacion di E.G. y ta encarga cu nan. E mama no kier pa E.G. bay na e cas pa no influencia e yiunan, ya cu na cas tampoco E.G. ta comporta. E.G. tabata 5 luna na estado, luna pasa ora el a wordo laga liber. E miembro di Reclasering ta haya cu E.G. mester a keda den KIA. El a bisa Hues cu el a papia cu Fundacion Hunto pa mira con lo por atende cu E.G. Parce cu E.G. a viola algun regla di Fundacion Hunto y a wordo rechaza na Centro Colorado. E miembro di Reclasering a mustra cu na September 2026 E.G. a wordo laga liber y el a bay keda serca un amiga cu su famia tambe ta un usador di droga. E miembro di Reclasering ta haya cu e mihor opcion ta KIA, caminda cu tin un lugar designa pa un mama keda cu un baby pa e promer aña.
TIN LEY PERO NO TA HACI NADA
Hues a splica cu tin ley caminda por obliga hende haya rehabilitacion obligatorio sera den un lugar, pero no tin ningun instancia caminda esaki por tuma lugar. Respaldo no ta disponibel pa tuma hende. Parce cu no tin ningun maneho stipula pa Gobierno cu ta habri e caminda pa rehabilitacion obligatorio. Hues a mustra cu na Hulanda esey si ta e caso.
FISCAL
Fiscal, na su turno, a bisa cu ta un hecho cu E.G. a importa cocaina. Fiscal ta haya cu mirando cu ta un dama na estado y adicto, no ta apropia pa lage liber.
Fiscal a exigi 18 luna di prison di cual 6 luna ta condicional cu 3 aña prueba. Fiscal a bisa cu ta mihor pa E.G. ta den KIA. Esaki bou guia di Reclasering. El a bisa Hues pa kita e libertad condicional y detencion di biaha di E.G.
ABOGADO
Abogado mr. Canwood a bisa Hues cu E.G. a admiti tur cos. E castigo exigi pa Fiscal ta cuadra pa e delito. Sinembargo ta trata di un dama adicto na estado. Dentro di poco e lo haya baby. E abogado ta haya cu mester pone atencion riba e adiccion di E.G.
ORDEN DI DETENCION DI DAMA
Hues a dicta sentencia di biaha. Hue ta haya legalmente proba cu E.G. a exporta 600 gram di cocaina. Hues a bisa cu contrario na e exigencia di Fiscal, e orientacion di sentencia di casonan di droga di Corte ta otro.
Hues a condena E.G. na 18 luna di prison di cual 9 luna ta condicional cu 3 aña di prueba. E castigo condicional tin e condicion special cu E.G. mester cay bou guia di Reclasering. Hues a bisa cu a purba cu E.G. lo por keda na un cas pero esey no a resulta. E otro opcion ta cu e mester bay KIA bek. Hues a suspende e decision di laga E.G. bay cas, loke ta habri caminda pa Ministerio Publico duna orden pa E.G. wordo deteni y hiba bek KIA. Esaki ta nifica cu E.G. lo wordo vigila den KIA y ora di haya yiu, e lo wordo hiba hospital.