E lider di fraccion di MEP, Evelyn Wever-Croes, a duna un splicacion detaya di e motibonan pakiko e fraccion di MEP a vota contra e Fondo di Inversion cu a wordo aproba den Parlamento pa un mayoria minimo di apenas 11 voto. Wever-Croes a enfatisa cu MEP no ta contra inversion al contrario, e partidonan ta genera surplus precisamente pa por inverti den e necesidadnan di Aruba pero a desaproba e forma iresponsabel y e riesgonan financiero cu e fondo aki ta trece cune.
Fraccion di MEP ta apoya inversion den e pais y ta reconoce cu tin hopi punto importante riba e agenda di inversion. Sinembargo, un fondo mester wordo maneha di manera responsabel y transparente.
E fondo presenta ta bini cu un lista di deseo di proyecto di e ministernan cu ta suma e cantidad di 59.5 miyon florin, pero Gobierno tin solamente 33 miyon florin na recurso real disponibel. Esaki ta crea un deficit directo di 26 miyon florin den e fondo, algo cu MEP no por apoya debi na e consecuencianan doloroso cu e deficitnan y mega-debenan di e gabinetenan anterior (Mike Eman 1 y 2) a laga pa e pais.
E di dos gran preocupacion ta cu e fondo aki ta kita e control y supervision necesario di e organo legislativo:
E lista di proyecto no tin un secuencia cla y no a pasa debidamente pa e Comision di Evaluacion cu ley ta exigi.