Un mucha cu siña lesa un etiketa di cuminda awe, por haci mihor escogencia mañan. Un mucha cu siña compronde y regula su emocionnan, ta construi algo cu e lo ekipa cu ne pa resto di su bida unda cu e por ta den e mundo aki. Pa parlamentario di PPA Eduard Pieters, precisamente ey ta unda enseñansa y salud ta encontra.
Durante un bishita di Parlamento na Pius X School na Dakota, den contexto di trabou di Comision di Parlatino di Agricultura, Pesca y Ganaderia, Pieters a mira den practica con e scol ta traha cu un concepto di scol saludabel y duna contenido na e area di formacion Movecion y Salud.
Pa Pieters, unda cu e mes tin un trayectoria largo den enseñansa, e bishita aki ta confirma algo fundamental: salud di mucha no ta solamente responsabilidad di sector di salud. E ta cuminsa tambe na cas y den klas.
Salud ta mucho mas cu cuminda
Loke particularmente a resalta pa Pieters ta e enfoke holistico. E muchanan no ta siña solamente tocante nutricion. Nan ta traha cu movimento, salud mental y fisico y escogencia saludabel. Lesa etiketa di producto ta parti di e proceso: mucha ta siña mira kico tin den nan cuminda y distingui entre e opcionnan, cu ta aporta na nan salud y esunnan cu no ta hacie.
“No ta solamente e parti di cuminda. Esaki no mester ta un vak sino un area di formacion hopi holistico: salud fisico, mental, movimiento y nutricion.” Pa Pieters, esaki ta educacion cu consecuencia pa bida real.
Di autoregulacion te inteligencia emocional
Pero e ambicion cu Pieters ta pone dilanti ta mas grandi. E kier mira nos muchanan desaroya capacidad pa autoregula emocionalmente, traha riba nan inteligencia emocional y compronde con pa hiba un bida balansa.
Pa Pieters esaki ta importante, pasobra e meta final di enseñansa no por ta solamente un mucha cu conoce materia academico. Aruba mester forma e hobennan cu ta fuerte tambe mentalmente y cu tin instrumento pa enfrenta bida. Segun Pieters esaki ta contribui: “Pa dia di mañan nos tin hobennan, nos tin ciudadanonan bon fuerte mentalmente y fisicamente, cu por sigui hiba e pais y e mundo aki dilanti.”
For di bon ehempel pa politica structural
Movecion y Salud ya ta inclui entre e areanan di formacion den e ‘kerndoelendocument’ oficial pa enseñansa primario di Aruba. E marco ta inclui, entre otro, salud fisico y mental, nutricion y movimento.
Pieters su mensahe politico ta pa e area di formacion aki bira un realidad structural den scol pa medio di cambionan den ley di enseñansa.
Segun Pieters, den un proximo gobernacion, unda cu PPA lo forma parti di dje, partido lo percura pa e.o. e area di formacion Movecion y Salud, “Beweging en Gezondheid” haya e lugar necesario den ley di enseñansa y implementacion debido dentro di curiculo di tur scol cu gobierno ta paga nan gastonan. Di e forma aki e “kerndoelen” y e metanan general y specifico cu e maestronan uza lo ta efectivamente y cada scol y directiva di scol ta garantisa calidad di enseñansa. Y no solamente maestro specialisa den Movecion y Salud. Pieters ta papia explicitamente di tur maestro den enseñansa primario, cu lo por traha cu e metanan, pa salud bira parti di formacion di e mucha y no un tema incidental.
Inverti den salud prome cu problema sigui escala
E bishita na Pius X School, pues, no tabata solamente un bishita di comision, ta mustra un escogencia politico posibel. Aruba por scoge pa atende consecuencia di problema di salud despues, of e por cuminsa forma habito, conocimento, balansa emocional y consciencia di salud desde mucha. Finalmente Pieters a expresa cu e ta opta pa e di dos opcion: “Pasobra un pais cu kier su ciudadanonan fuerte mañan, mester cuminsa awe forma nos muchanan saludabel, fisicamente, mentalmente y emocionalmente”.
