Dos edificio, dos realidad completamente diferente y segun parlamentario di PPA, Eduard Pieters, un solo problema politico: falta di decision, curashi y vision.
Durante conferencia di prensa den centro di Oranjestad awe mainta, districto caminda Pieters mes a nace, e parlamentario a para deliberadamente entre dos escenario.
Na un banda, un edificio completamente den decadencia. Na otro banda, un propiedad, caminda e inversionistanan local a inverti miyones di florin, pero cu segun Pieters, ta lucha pa haci uzo adecuado di nan inversion. Pa Pieters, e contraste aki ta simbolisa loke ta pasando, no solamente na Oranjestad, sino na San Nicolas y e otro districtonan di Aruba.
Nos no por sigui castiga esun cu ta haci cos corecto
Pieters su preocupacion ta cu e inversionistanan local, cu sigui proceso legal ta keda tranca, mientras nan capital ta para. Segun Pieters, algun ya ta considera inverti nan placa den otro pais. E consecuencia, Pieters ta alerta, ta peligroso: si e sistema ta castiga esun cu haci su due diligence y sigui caminda legal, Gobierno ta crea incentivo pa hende busca otro ruta.
“Esun cu ta haci su trabou manera mester ta, ta wordo castiga. Esey mester stop!”
ROPV mester evoluciona cu Aruba
ROPV a drenta na vigor na 1 september 2021. Despues di cinco aña, Aruba mester evalua si e instrumento ainda ta responde adecuadamente na realidad economico, ecologico, social y teritorial di pais. Segun Pieters, PPA a combersa cu ciudadano, ambientalista y economista y ta pone tres punto riba mesa.
Prome: densidad. Oranjestad y San Nicolas mester haya mas posibilidad pa aumenta densidad, incluyendo mas vivienda den centro. Mas hende bibando den ciudad ta crea tambe mas actividad economico.
Di dos: construccion vertical. Aruba su superficie no ta crece. Pa Pieters, uzo mas eficiente di espacio ta nifica crea posibilidad pa construi mas verticalmente, naturalmente acompaña pa infrastructura adecuado.
Di tres: revisa zonificacion y e fronteranan entre area habita y naturaleza. Meta, segun Pieters, mester ta dobel: proteccion real di naturaleza y suficiente espacio pa vivienda y desaroyo.
E propio ROPV ta busca un ekilibrio entre desaroyo economico y social y proteccion di naturaleza y ambiente.
Oranjestad no ta solamente Wilhelminastraat
Pieters tambe a critica loke e ta considera un enfoke demasiado limita riba revitalizacion di nos capital. E ta di acuerdo cu e atencion cu minister y gobierno ta duna Wilhelminastraat, pero ta recorda nan cu Oranjestad ta inclui: Havenstraat, De La Sallestraat, John G. Emanstraat y e barionan alrededor. “Bo no por drecha dies meter, pone klinkers y bisa cu bo ta inverti den Oranjestad.”
Pa Pieters, revitalizacion mester ta holistico: planificacion espacial, infrastructura, vivienda, inversion y actividad economico mester move hunto.
Gobierno tin instrumento; loke falta ta curashi pa tuma decision
Articulo 7.1 di ROPV efectivamente ta duna minister facultad, bou di e condicionnan, pa modifica e destinacionnan y e ‘voorschriftnan’ pa iniciativa, cu tin balor economico, turistico, recreativo, habitacional of pa empleo agrega. E facultad no ta aplica na cierto zona protegi y ta inclui e condicionnan ambiental y di habitabilidad (e condicionnan pa garantisa un ambiente adecuado y sigur pa biba).
Pieters su yamada pa Gobierno ta, pa nan sinta cu e inversionistanan y uza e instrumentonan legal caminda nan ta aplicabel, mientras e proceso pa evalua ROPV ta avanza. Segun Pieters, cada dia, siman y luna cu Gobierno no actua, ta aumenta riesgo cu capital local ta busca oportunidad afo.
“Aruba no tin solamente un problema di edificio den decadencia. E problema mas grandi ta ora inversionista ta cla pa construi futuro, pero Gobierno no ta cla pa dicidi,” Eduard Pieters a finalisa bisando.