Diadomingo atardi, un tragico accidente di trafico riba e caminda di Grapefield a cobra bida di un hoben di 23 aña di edad. Cu e suceso lamentabel aki, e cifra di victimanan mortal den trafico na Aruba pa e aña aki a yega na dies (10).
Alrededor di 2:58 di atardi, Central di Polis a ricibi un yamada drenta via Alarm Central informando di un accidente grave riba e caminda di Grapefield na San Nicolas, caminda un vehiculo tipo UTV a bolter y un di e ocupantenan tabata seriamente herida.
Tanto patruyanan di polis como personal di ambulance a wordo despacha cu urgencia pa e sitio. Na yegada, e oficialnan a constata cu e UTV, pa motibonan cu ainda ta bao investigacion, a perde control y a bolter.
E personal di ambulance a brinda asistencia medico di inmediato na e chauffeur, pero lamentablemente debi na e severidad di e golpinnan, e victima no tabata reacciona mas y no por a haci nada mas p’e.
Docter forensico cu a presenta na e luga a constata oficialmente e morto di Kimberly van Ardenne, naci na Hulanda di 1 di november 2002 (23 aña di edad).
Na e sitio di e desgracia a presenta polis forensico hunto cu di e specialistanan di trafico pa efectua e investigacionnan corespondiente pa aclaria con e accidente a tuma luga. Tambe personal di Slachtofferhulp a wordo activa pa brinda e apoyo emocional e momento dificil aki.
Cuerpo Policial Aruba a expresa nan mas profundo palabra di condolencia y forsa na famia y conocirnan di e fayecido.