Parlamentario Shailiny Tromp-Lee ta cuestiona e falta di claridad riba e proceso di consensusrijkswet

Experiencia durante pandemia ta pone enfasis riba e necesidad pa clarifica con consensus ta
wordo forma y con e paisnan ta participa.
Durante e reunion Tripartiet di Parlamento di Aruba, Corsou y Sint Maarten, teni dia 15 di
october na Corsou, Parlamentario Shailiny Tromp-Lee a aborda e tema di leynan di Reino y e
proceso pa yega na un consensusrijkswet (consensus-RW).
Tromp-Lee a hala atencion pa e experiencia durante pandemia, ora e necesidad di yudansa
financiero a wordo relaciona cu condicionnan cu e paisnan mester a acepta. E experiencia aki
a trece pregunta riba e espacio real cu e paisnan tin pa delibera y determina nan posicion den
circunstancianan di presion financiero.
E parlamentario a enfatisa cu mester tin mas claridad riba kico ta un consensus-RW y,
specialmente, con ta yega na esaki:
 Cua proceso mester wordo sigui?
 Con e paisnan ta participa den e deliberacionnan?
 Y con ta garantisa cu e proceso pa yega na consensus ta cla y transparente pa tur e
paisnan concerni?
Tromp-Lee a recorda cu durante IPKO a wordo papia y acorda riba un proceso pa trata e
tema aki. Sinembargo, segun el a señala durante e reunion Tripartiet, e gobiernonan ainda no
ta cumpliendo cu e acuerdo aki.
Pa e parlamentario, no ta suficiente pa tin un acuerdo riba papel. Mester tin un proceso
concreto, cu pasonan cla y participacion di e paisnan, pa e principio di igualdad den Reino
por wordo respeta den practica.
E experiencia di pandemia ta duna un motibo adicional pa trata e tema aki cu seriedad y
clarifica e procedementonan, pa e paisnan compronde claramente con ta forma consensus y
cua ta nan rol den e proceso.
Finalmente, a keda palabra cu e islanan mes lo sigui traha hunto riba un proposicion pa
hancra e proceso aki den nan propio leynan nacional.