Líder opositor venezolana María Corina Machado a publica un comunicado nacional den cual ella declara cu, segun su posicion, Nicolas Maduro ta enfrentando husticia internacional pa crimenan cometi contra pueblo Venezolano y ciudadano di otro paisnan. Segun e declaracion, e situacion actual a surgi despues cu Maduro a rechasa un salida negocia, y cu Estados Unidos a dicidi actua pa haci cumpli e ley.
Machado a indica cu e momento a yega pa restablece Soberania Popular y Soberania Nacional den Venezuela. Entre e metanan menciona ta restablece orden, libera preso politico, reconstrui e pais y crea condicionnan pa regreso di Venezolanonan cu ta biba na exterior.
Den e comunicado, e lider opositor a enfatisa cu e pueblo Venezolano a lucha durante hopi aña pa logra un cambio democratico, y cu e proceso cu a cuminsa awor ta resultado di e sacrificionan haci. Machado a referi na eleccion di Edmundo Gonzalez Urrutia como presidente legitimo di Venezuela, indicando cu el mester asumi poder constitucional y wordo reconoci como Comandante en Hefe di e forsanan arma Nacional.
Machado a agrega cu e movemento democratico ta prepara pa haci cumpli su mandato, y a yama na vigilancia, organisacion y accion continuo te ora cu un Transicion Democratica wordo concretisa. Ella a enfatisa cu e proceso aki ta rekeri participacion di tur sector di e sociedad.
Finalmente, e lider opositor a dirigi un yama tanto na Venezolanonan den e pais como riba exterior, solicitando preparacion, mobilisacion y cooperacion internacional pa reconstruccion di un “nobo Venezuela”. E comunicado a termina cu un mensahe di determinacion, expresando cu Venezuela lo bira un pais liber.
