Den cuadro di e Dia Internacional di Alzheimer (celebra dia 21 di september), Fundacion Alzheimer Aruba (FAA) a organisa un encuentro cu a conta cu un sala completamente yen. Durante e anochi, e presidente di e fundacion, neuropsicologo Melva Croes-Yánez, a duna un mensahe fuerte tocante e reto cu pashentnan y famianan ta enfrenta na Aruba pa haya un diagnostico corecto di trastorno neurocognitivo, specialmente e malesa di Demencia Frontotemporal (FTD).
Croes-Yánez a aclaria cu e fundacion no ta atende unicamente pashentnan cu Alzheimer, sino tur tipo di trastorno neurocognitivo. Sinembargo, e atencion mundial pa FTD a aumenta significativamente desde 2022, ora cu e famoso actor Bruce Willis a wordo diagnostica cu e condicion aki.
Un ‘misterio’ medico cu ta hiba na falta di comprendemento
E presidente di FAA a splica cu FTD ta wordo considera un “misterio” pasobra no tin un causa conoci ni tampoco un cura. E falta di conocemento aki ta haci cu hopi biaha dokternan ta “misjudge” e sintomanan, atribuyendo e cambionan di comportamiento na otro factor y yegando hasta na desacredita e kehonan di e famia.
Den algun caso lamentabel na Aruba, ora cu famianan a busca ayudo pa e cambionan drastico di conducta den e pashent, dokternan a yega di contesta e casa cu “ta e mes mester di un chekeo” y no e pashent. Croes-Yánez a cualifica e actitud aki como ignorancia cu ta faya den busca e causa real tras di e keho di un famia den necesidad.
Confusion den diagnostica y e barera pa un ‘second opinion’
E situacion di e diagnosisnan na Aruba ta hopi preocupante y confuso pa e pashentnan:
- Diagnostico incoherente: Tin pashentnan cu ta ricibi prome un diagnostico di Alzheimer, despues uno di mild cognitive impairment, y na final e cuadro no ta cuadra (it doesn’t make sense).
- Blokeo pa di dos opinion: Sin un diagnostico fiho y cla, e pashent no por solicita un second opinion. Ademas, e neuropsicologo a señala cu tin profesionalnan cu ta reacciona cu rabia ora un pashent of famia pidi pa un di dos opinion medico.
E cuestionamento riba e calidad di cuido pa e ciudadano local
E liderazgo di Fundacion Alzheimer Aruba a conclui cu e tratamento aki no ta aceptabel y cu e sistema no por sigui maneha e pashentnan local di e forma aki. Croes-Yánez a cuestiona cu e mesun nivel di atencion medico cu ta wordo brinda na turistanan mester ta garantisa tambe pa e ciudadanonan di Aruba ora nan ta enfrenta condicionnan compleho manera FTD.
