E lansamento di Centro Pashent di Aruba a haya un respaldo fuerte for di e liderato di salud di e pais. Durante e evento, Minister encarga cu Salud Publico Mervin Wyatt Ras a enfatisa cu e pashent mester tin un rol activo y un bos fuerte den e cuido cu e ta ricibi, reafirmando cu e iniciativa aki ta un paso fundamental pa fortalece e sistema di salud na Aruba.
Cuido accesibel y respet pa e derechonan di pashent
Segun e mandatario a subraya cu e cuido di salud na Aruba mester keda garantisa y accesibel pa tur ciudadano, caminda e derechonan di e pashent ta keda salvaguardia na tur momento.
“Semper mi a kere cu pashentnan tin derecho y cu naturalmente, ora bo ta haya cuido, bo tin algo di bisa den e cuido ey. Nos cuido na Aruba mester ta accesibel pa tur hende y nos mes mester garantis’e,” a declara e Minister di Salud Publico.
E mandatario a menciona tambe e importancia di un bon guia y referencia ora un pashent mester di atencion di un specialista adecua, como tambe e necesidad di tin canalnan cla pa canalisa keho of inkietud. Maske Aruba tin instancianan oficial manera Inspectie Volksgezondheid Aruba (IVA), e union di e pashentnan mes den un organisacion ta wordo mira como un complemento valioso pa atende cu nan propio derechonan.
E minister a elogia e composicion di e directiva y e ekipo tras di Centro Pashent di Aruba, destacando cu e ta consisti di un mescla di profesionalnan, personal di media, y representacion di diferente grupo di edad:
- Jaburtt Dijkhoff
- Melva Croes-Yanes
- Nurianne Arias
- Xiomara Everon (reconoci den e ambito di media)
- Ivo Valdez
- Anselmo pontiluis
Gobierno como Partner den Dialogo
Como encarga di e cartera di salud, e Minister a confirma cu Gobierno di Aruba ta mira Centro Pashent di Aruba como un socio clave den e discusionnan y e dialogo continuo cu tur e partnernan den e sector di cuido.
“Como gobierno y minister encarga cu salud publico, nos ta un partner den e discusion y e dialogo cu e diferente organisacionnan den cuido, y naturalmente tambe cu un plataforma di conseho manera esaki. Pabien y hopi exito cu e trabou,” e minister a conclui.
