Diaranzon merdia mester a tuma lugar e caso penal cu Ministerio Publico a cuminsa contra e dama Chania Chante Fernandes Pedra, relaciona cu e lamentable accidente cu a sosode riba 4 Januari 2025, caminda Chania manehando un Jeep, a dal mata e dama Josely Paulina Vasquez (65) y e homber Carlos David Vialez Valeiro (54) y sigui core bay.
Por a compronde cu Hues a trata un parti su di e caso y despues mester a para door di e carta di keho di Chania contra Hues.
JEEP A DAL E VICTIMANAN Y CORE BAY
Ta asina cu Hues a dicidi cu ta sigui cu tratamento di e caso despues cu diferente biaha a duna Chania e chens di haya abogado paga door di Gobierno, pero cada biaha pa un of otro motibo Chania no ta haya abogado.
Hues a bisa cu segun e raport di Polis, dia 4 Januari 2025 anochi Polis a haya notificacion cu auto a dal hende y core bay. Polis a bay banda di restaurant Lucys caminda a mira dos hende benta abao riba caminda y no tabata duna señal di bida. Tin hende a bisa Polis cu un grupo di 4 hende tabata cruzando e caminda grandi banda di restaurant Lucys. A mira un Jeep bin cu velocidad halto y no por a evita e accidente.
E Jeep a dal un dama y un otro dama a cuminsa grita. E Jeep a para un rato riba un distancia y a sigui core bay. E victima dama a perde conocemento y perde un parti di pia y no tabata duna señal di bida. Tabatin un homber, cu tambe a wordo gedal door di e Jeep y no tabata duna señal di bida. Polis a cuminsa busca e pia di e dama y a hay’e riba un distancia. Tambe Polis a bin haya riba un distancia, parti di e homber cu tambe a kita door di e impacto fuerte.
Hues a sigui bisa cu Polis a cuminsa investiga y for di cameranan di seguridad a constata cu e Jeep a core cu velocidad hopi halto. A logra mira e number di e Jeep y a haya sa di kende e Jeep ta.
ACUSADO BOU INFLUENCIA DI ALCOHOL
Polis a bay na cas di e tata di Chania y a constata cu e Jeep su luznan tabata sendi y e motor tabata cayente. E acusado Chania tabata eynan y hopi emociona.
Polis a haci test di alcohol riba Chania y a constata 295 microgram di alcohol den Chania su curpa. Esaki ta indicacion cu Chania tabata bou influencia di alcohol.
IMPACTO DI JEEP A BENTA E VICTIMANAN HOPI LEU
Investigacion tecnico na e lugar di accidente ta mustra cu e impacto tabata hopi fuerte. Door di e impacto asina duro, e victima dama a bay cay 22 meter mas leu mientras cu e victima homber a bay cay 81 meter mas leu for di e lugar di impacto.
VIDEO DI ACCIDENTE PASA DEN CORTE
Hues a bisa cu e ta bay pasa imagennan di e accidente y si tin famia di e victimanan cu no kier mira, por sali for di sala di Corte y despues por drenta bek. Tabatin famia cu a sali na yoramento. Hues a bisa cu Polis a haya imagennan di hopi camera di seguridad caminda ta mira con e accidente a sosode. Hues a pasa e imagennan caminda por mira con duro e jeep tabata core. Tabata increibel pa mira con duro e Jeep tabata core riba Boulevard y yega e brug di Renaissance Hotel.
Tabata hororoso pa mira cu ora di e impacto, con leu e victimanan a bay cay. Despues ta mira cu riba un distancia e Jeep a para un rato y despues a core bay cu velocidad.
CASO POSPONI
E momento cu Hues tabata pasando e imagennan di e impacto, un trahador di oficina di Corte a yega serca Hues y dun’e un mail cu a caba di yega. E mail ta encera cu Chania a keha e Hues. Esey a haci cu Hues mester a para e caso e momento ey. Hues a pospone e caso un rato pa bay check con lo bay sigui. Despues di un rato el a bolbe y a informa Chania cu Diabierna 6 November 2026, tres Hues lo bay trata e keho y cu Hues ta pospone e caso te dia 18 November 2026, caminda lo sigui cu e tratamento.
Mayan mainta, tres Hues lo bay trata e caso y lo dicidi si e keho di Chania tin base of no y si e Hues ta sigui cu tratamento di e caso of si mester laga un otro Hues trata e caso.