Joseph Lancelot Hassell, un habitante di 74 aña di e isla di Saba cu a desaparece diasabra atardi, a ser haya bibo dialuna atardi despues di un buskeda intensivo. E Entidad Publico Saba a confirma cu nan a haya e grato noticia banda 4:30 atardi ora local. Reportenan ta indica cu Joseph a wordo localisa den un area di dificil acceso ariba ‘Sulphur Mine Trail/Spring Bay Trail’.
Mariniernan Hulandes asisti pa un helicopter,ta esnan cu a haya Hassell y a haci e rescate. A trece cachonan cu por sigui pista di holo di e persona, drones y mas di 50 boluntario pa yuda den e buskeda di Joseph cu a ser perdi den e hiking trailsnan panoord di e isla. E tereno na e parti panort di e isla ta un tereno hopi accidenta y di dificil acceso.
Tambe un grupo di Mariniers Hulandes den e area a yuda den e buskeda diadomingo y dialuna cu helicopter, mientras un grupo di Coast Guard di Caribe Hulandes tabata patruya e costanan hunto cu esunnan den aire y ariba tera. Drone cu camaranan infrared a wordo uza den e operacion pa identifica e desaparecido.
Pa diadomingo atardi e gobierno di Saba a confirma cu nan a busca den areanan manera Sulphur Mine, All Too Far, Elfin Forest, Sandy Cruz, y e camindanan mas dificil manera North Coast trail, cu ta prohibi pa bay pa hikernan sin un guia cu experiencia. Henter e cooperativo aki a duna e resultado positivo y Joseph a ser haya despues di 3 dia sano y salvo, cu señalnan cla di deshydratacion y actualmente lo keda bao observacion medico.