Parlamento di Corsou a fungi como anfitrion pa e reunion Tripartit entre e delegacionnan di Parlamentonan di Aruba, Corsou y Sint Maarten. Despues di e apertura oficial di e reunion, a cuminsa cu e repaso di e acuerdonan cu a keda haci den e Tripartit anterior. A sigui cu e presentacion di e Petit Comité Geschillenregeling, cu a duna un resumen di e progreso di su trabou relacioná cu e areglo di diferencia (Geschillenregeling). Pa cada Tripartit ta determina e temanan di antemano cu lo trata durante e reunionnan, pues tambe pa e reunion di awe. E siguiente punto riba agenda tabata deliberacion riba diferente propuesta di Ley di Reino, como ehemplo pa enfatisa con Hulanda ta inicia procesonan cu ta toca e paisnan Aruba, Corsou y Sint Maarten sin consulta previo cu e paisnan aki. Riba esaki e delegacionnan a yega na acuerdonan concreto. Ademas, e delegacionnan a informa otro di nan posicion como pais pa loke ta trata posibel prolongacion di e Arreglonan Mutuo den forma di Landspakket y e esfuersonan cu Parlamentonan y Gobiernonan ta haci riba e tema di pasado di esclavitud. E reunion a brinda e delegacionnan parlamentario e oportunidad pa intercambia di opinion riba e topiconan menciona y pa delibera riba asuntonan relevante pa e cooperacion entre e paisnan di Caribe den Reino Hulandes. E reunion Tripartit a tuma luga tras di porta cera y no tabata habri pa publico ni prensa. E siguiente reunion Tripartit lo ta dia 12 di diana proximo na Sint Maarten.
Parlamentonan di Aruba, Corsou y Sint Maarten a delibera riba diferente topico durante reunion Tripartit na Corsou
