Dia 14 di september na Bonaire, a entrega na diputado Timoteo Silberie e Conseho di Hoben pa islanan BES. A realisa e conseho aki a base di un investigacion di UNICEF Hulanda y Ipsos I&O entre hobennan di Bonaire, Sint Eustatius y Saba. Hobennan a contribui na esaki compartiendo nan experiencianan, preocupacionnan, ideanan y recomendacionnan. Cu e entrega aki, a pone e puntonan aki directamente na conocemento di colegio ehecutivo di Entidad Publico Bonaire.
Durante e encuentro, diputado Silberie a tuma tempo pa conversa tocante loke hobennan na Bonaire ta halla importante. A subraya claramente cu gobierno no solamente mester papia tocante hoben, sino especialmente cu e hobennan mes. E diputado a expresa su aprecio pa e rol positivo di Ibrahim Valentijn, cu a entregu’e e raport. Ademas, e diputado a gradicie enfaticamente pa su dedicacion, compromiso y disposicion pa representa e bos di e hobennan.
Conseho di Hoben islanan BES 2026 ta mustra cu hobennan ta sinti cu gobernantenan no ta scucha nan suficientemente. Den e investigacion, hobennan ta duna Entidad Publico Bonaire un promedio di 5,4 pa scucha hoben y muchanan. Casi mitar di e hobennan ta indica di tin poco te hopi poco confianza den Entidad Publico Bonaire. Mes momento, nan ta menciona topiconan concreto cu segun nan mester di accion, manera salud mental, tentamento y riesgonan di seguridad for di otro pais.
P’esei pa Bonaire e entrega aki ta un paso importante. E diputado tin intencion di bay conversa mas biaha cu e hobennan, pa asina nan bos haya un lugar structural den maneho y gobernacion di Bonaire. E meta ta pa scucha miho loke e hobennan ta experiencia, kico ta preocupa nan y cual solucion nan mes ta propone.
“Bos di e hobennan ta indispensabel ora ta traha maneho cu ta bay tocante nan futuro. E entrega aki ta un bon cuminsamento pa envolvi e hobennan na Bonaire mas frecuentemente y miho den decisionnan cu ta toca nan,” segun diputado Timoteo Silberie.
Di e manera aki, e hobennan kier laga mira con importante ta cu nan por comparti nan experiencianan y cu ta tuma nan na serio. Entidad Publico Bonaire ta considera e entrega di e Conseho di Hoben aki como un paso concreto pa fortalece nan envolvimento. Dialogando regularmente cu e hobennan, por tene mas cuenta cu nan aporte den maneho y ejecucion.
