Minister di Finansa, Asunto Economico y Sector Primario, mr. Geoffrey Wever, a firma un decreto ministerial cu ta permiti Gobierno di Aruba absorbe mita di e aumento den prijs di combustibel. E decision aki, cu tin como meta principal pa proteha e poder di compra di e ciudadano, ta wordo presenta como un prueba concreto di e balor di e Autonomia di e isla, specialmente den cuadro di e debate actual rond di e ley di supervision financiero, Rijkswet HOFA.
Segun e calculonan basa riba e mercado internacional, prijs di gasolin mester a registra un subida di 49.3 cen e luna aki, mientras cu diesel lo a subi cu 83.5 cen. Sinembargo, cu e intervencion directo di Gobierno, e aumento pa consumidor lo keda limita na aproximadamente 24.57 cen pa gasolin y 45.20 cen pa diesel.
Autonomia como herment di proteccion
E punto central di e anuncio aki ta cu e medida por a wordo implementa danki na e Status Aparte y e poder politico cu Aruba tin pa tuma su propio decisionnan financiero. Si e ley HOFA (Rijkswet Houdbaarheidsnormen Financiën Aruba) tabata na vigor, e proceso lo tabata radicalmente diferente.
Bou di HOFA, un decision di e magnitud aki lo mester a wordo presenta prome na Tweede Kamer na Hulanda pa aprobacion. Esaki ta nifica cu e autoridad pa dicidi riba e bienestar economico di e pueblo Arubiano lo no a residi exclusivamente den e Conseho di Ministernan local, sino den un organo parlamentario exterior cu tin e potestad pa nenga e peticion.
Como ehempel, a wordo cita e situacion di Boneiro, unda Hulanda a nenga un peticion similar pa absorbe prijs di gasolin y diesel, a pesar di e presion economico cu e habitantenan di e isla biniendo ta enfrenta, segun informacion ricibi di Boneiro.
E costo di e medida aki pa caha di Gobierno ta wordo estima na 2.5 miyon florin pa luna (1.5 miyon pa gasolin y 1 miyon pa diesel). Pa por financia esaki sin afecta e stabilidad financiero a largo plaso, Gobierno a dicidi riba un re-prioritisacion di gasto publico:
- Creacion di un buffer: Pa adresa e crisis internacional di energia.
- Postponi proyectonan: Cierto proyectonan di infrastructura lo wordo pospone pa aña 2027 pa crea e espacio financiero necesario.
Minister Wever, den cooperacion cu Banco Central di Aruba, CBS y RDA, ta monitor e situacion di cerca. Analisisnan actual ta indica cu e aumento aki tin un caracter temporal den e mercado internacional.
E decreto ministerial aki ta keda como un ehempel di e capacidad di e gobierno local pa actua rapidamente den crisis, un facultad cu lo por wordo comprometi den futuro si Aruba drenta den e structura di HOFA.