GGD Bonaire / Salubridad Publico di Entidad Publico Boneiro a lansa e campaña Nothing Nada Nix18. Cu e campaña aki ta pone atencion riba e riesgonan di uzo di alcohol bou di 18 aña. E campaña ta dirigi su mes riba hoben, mayor, miembronan di familia y otro adulto.
E lansamento oficial na Boneiro a tuma luga awe, 14 di october 2026, cu desvelo di e mural di Nothing Nada Nix18. Na e lansamento tabata presente diputado Timoteo Silberie, señora Sulay Lau na nomber di ministerio di Salubridad Publico, GGD Bonaire / Salubridad Publico, partnernan y otro organisacionnan envolvi.
Tur hende tin un rol Aunke hobennan ta siña haci eleccion consciente nan mes, nan no ta nan so. E campaña Nothing Nada Nix18 na prome luga ta dirigi su mes riba e rol crucial di e ambiente. Mayornan, pero tambe miembronan di familia, scolnan, organisacionnan y otro adultonan por contribui na un ambiente den cual hobennan por crece na un manera sano y seguro. Dunando bon ehempel y papia cu hobennan tocante alcohol, adultonan por sostene hobennan pa haci eleccion saludabel.
E mensahe cu imagen y musica Nothing Nada Nix18 ta adaptacion caribense di e campaña NIX18. A desaroya e campaña cu aporte di e region caribense y ta present’e na Boneiro, Sint Eustatius, Saba, Aruba, Curaçao y Sint Maarten. Transmitiendo huntu e mesun mensahe, e islanan kier yega na hoben- y adultonan na un manera cu nan por reconoce.
Un parti importante di e campaña ta un cantica y videoclip cu ta disponibel na papiamento, hulandes y ingles. Via musica y imagen ta transmiti e mensahe na un manera accesibel. E videoclip ta bai tocante e consecuencianan di uzo di alcohol na edad hoben y tin como obhetivo stimula un conversacion tocante esaki.