Un grupo di trahado di Wit Gele Kruis (WGK), hunto cu presidente di Sindicato AVB, Gina Maduro, a tene un reunion general pafo di e edificio di WGK na Santa Cruz pa expresa nan disgusto y malcontento pa cu e maneho actual di gerencia.
Durante e encuentro, a bin dilanti cu e trahadonan cu por a acudi a haci esaki pa laga nan voz resona, mientras cu a percura pa e cuido di e pashentnan no keda afecta. Segun Maduro, e situacion interno den e fundacion ta sumamente preocupante debi na e desigualdad laboral existente.
“Nos tin dos tipo di trahado den Wit Gele Kruis: uno cu beneficio y uno sin beneficio,” Maduro a duna di conoce. E sindicato ta boga fuertemente pa elimina e discrepancia aki y pa logra un trato igual pa tur miembro di personal cu ta desplega nan labor den e instancia di cuido.
Ademas, presidente di AVB a señala cu e posicion di e directiva di WGK ta un obstaculo grandi pa yega na un solucion. Segun Maduro, e director di Wit Gele Kruis ya caba a vocifera su postura y a indica claramente di ta contra pa ahusta e condicionnan y otorga igualdad na e trahadonan.
Mirando e falta di informacion di parti di gerencia y e malcontento creciente bou di e empleadonan, Sindicato AVB ta di opinion cu e situacion actual ta rekeri un investigacion profundo den Wit Gele Kruis pa atende cu e iregularidad nan y garantisa e derechonan di e trahadonan.
