Famia di Shanaya Fernandez Pedra, representa pa Alex Matthew, a expresa nan profundo preocupacion y desacuerdo cu e manera cu e proceso hudicial alrededor di e caso di Fernandez Pedra ta andando. Segun Matthew, tin un falta di exactitud den e proces-verbalnan oficial di e sesionnan di corte, cual ta resalta e mester urgente pa introduci grabacion di audio den sala di husticia na Aruba.
Durante e ultimo sesion di corte cu a tuma luga dia 2 di october ultimo, e famia a nota discrepancianan substancial entre lo cual a sosode berdaderamente den sala y lo cual ta keda registra den e proces-verbal redakta pa e griffier. Segun Matthew, e resumen shorthand cu e griffier ta elabora ta laga detayenan crucial afo, loke ta perhudica e berdad y e defensa di e acusado.
Preocupacion riba e representacion di e proceso
Un di e puntonan di mas sensibel cu Alex Matthew a trece padilanti ta e impresion cu ta keda crea den sala di corte y presenta na prensa. Durante e sesion di dia 2 di october, e hues pa e caso aki, a wordo scucha ta cuestiona e acusado repetidamente tocante e eleccion di su representacion legal, haciendo preguntanan manera di con e no kier e abogado cu a wordo asigna p’e.
Matthew ta enfatisa cu e dinamica aki ta crea un percepcion incorecto pa publico y prensa presente, haciendo cu ta parce comosifuera e acusado mes ta tratando di stoba of retrasa e proceso hudicial pa no tin abogado, mientras cu e realidad y e contexto completo di e situacion no ta keda debidamente refleha.
Peticion pa grabacion y transparencia den corte
Pa garantisa cu tin un husticia berdadero y transparente na Aruba, e representante di e famia ta haci un yamada directo pa reforma e manera cu e sesionnan di corte ta wordo registra y cubri.
Entre e puntonan clave cu a wordo enfatisa tin:
- Grabacion di audio pa e griffier: E proceso di traha proces-verbal mester wordo apoya pa un grabacion di audio completo di e sesion. Esaki ta permiti pa e registronan oficial contene precisamente tur palabra cu wordo pronuncia den corte, garantisando cu tanto e abogadonan como e partidonan envolvi tin acceso na un relato exacto di e sesion.
- Acceso pa prensa graba: Prensa mester haya e permiso pa graba por lo menos audio den sala di corte ora nan ta cubri e casonan. Esaki lo sirbi como un control di transparencia y lo duna e pueblo di Aruba un bista real di lo cual ta sosodiendo den e sistema hudicial.
Alex Matthew a conclui reiterando cu pa Aruba por tin un sistema di husticia husto y confiabel, ta esencial pa transparencia y e exactitud di e registronan hudicial keda garantisa na tur momento.