Den cuadro di e celebracion di Dia di Bestia, na vetarinario Contreras a organisa un exitoso jornada di medicina preventivo enfoca riba e bienestar di e mascotanan den comunidad. Durante e actividad aki, doñonan di cacho y pushi a haya e oportunidad di duna nan bestianan cuido veterinario di bon cualidad na prijsnan social y reduci.
Cuido Preventivo y Prijsnan Accesibel pa Comunidad
Shawn Franca, asistent veterinario, a splica cu e obhetivo principal di e campaña tabata pa brinda un man di ayudo na e doñonan di mascota cu tin dificultad pa cubri e costonan di cuido veterinario:
- Desparasitacion (Deworming) y Vitamina: Disponibel pa solamente 5 florin.
- Vacuna pa Cachó: Ofrece pa 45 florin.
- Vacuna pa Pushi: Ofrece pa 80 florin (un reduccion significante compara cu e prijs regular cu normalmente ta rond di 120 florin).
- Check-up Gratis: A organisa evaluacion di salud pa e mascotanan completamente gratis, danki na e valioso colaboracion y ayudo di e studiantenan y personal di Xavier University.
Franca a resalta cu e cuido di un mascota no ta limita na un solo dia di e aña, sino cu e ta exigi un atencion constante y mensual pa preveni malesanan grave cu ta comun na Aruba:
“Ta sumamente importante pa mantene bo bestia desparasita. Algo cu ta sagrado aki na Aruba ta e tratamento tur luna contra bichi di curason, como tambe e prevencion contra garapata y purga. Mantene e vacunanan up-to-date, duna nan bon cuminda fresco, awa limpi tur dia, y trece nan pa un check-up veterinario minimo un biaha pa aña.”
Tocante e problema di e poblacion di mascota, e asistent veterinario a menciona cu e esfuerso pa sterilisa y castra bestianan ta sigui intensamente tanto cerca nan como cerca otro veterinarionan, logrando atende un gran cantidad di animal pa dia.
E campaña pa Dia di Bestia a resulta den un exito total, cu mas di 100 mascota ricibiendo nan tratamento di desparasitacion y vacuna.
“Mi ta hopi contento cu e resultado. Mi ta masha contento cu tabatin hendenan cu ta stima y preocupa suficiente pa nan bestianan pa tuma e tempo pa trece nan y duna nan e cuido cu nan mester,” Franca a conclui.