Den e ultimo congreso di Partido di Pueblo Arubano (AVP), a tuma luga un transicion di liderazgo di gran transcendencia politico. Despues cu e lider di trayectorio largo, Mike Eman, a tuma e decision di termina su careda politico na cabes di e organisacion, Wendrick Cecilia a keda presenta pa asumi e responsabilidad di hiba e partido den un era nobo.
Expresando un sentido di orguyo y satisfaccion, Wendrick Cecilia a subraya cu e transicion aki ta bini compaña pa un gran compromiso cu e futuro di Aruba. Cu e retiro di Mike Eman di e liderazgo, AVP ta drenta oficial den un proceso di relvo generacionnan.
“Nos ta asumi e bunita responsabilidad aki cu compromiso, cu hopi corahe, energia y motivacion pa sigui hiba Aruba dilanti y hiba nos organisacion den dimensionnan nobo,” Cecilia a declara, recordando cu AVP ta un partido di historia y di lidernan cu tabata trendsetters den nan respective epocanan.
Cecilia a enfatisa cu e liderazgo nobo ta keda fiho strena den e idealnan y principionan Cristian Democrata cu ta defini e partido: solidaridad, dignidad humano, responsabilidad comparti y sostenibilidad.
Segun e lider nobo, e meta principal ta pa e progreso economico di e pais no keda den un solo sector, sino cu e mester yega den cada bario y den cada cas na Aruba. E ta considera e responsabilidad pa goberna den un futuro gabinete di AVP como un privilegio sagrado cu e pueblo ta duna e organisacion.
E concepto di “generacion nobo” no ta mara unicamente na edad, sino na e conviccion y e deseo di curason pa sirbi e pais.
“Aruba ta enfrenta hopi reto y barera riba nivel di maneho, ley y e desaroyonan internacional cu nos tin cu prepara p’nan. E solucion ta den e creatividad di nos hendenan. Ora nos uni nos forsa como pais, nos sa kico nos potencial ta y kico nos por logra,” Cecilia a señala.
“E Momento di Dios ta Perfecto”
Reflexionando riba su mesun careda politico, cu a inicia for di un edad hopi hoben, Cecilia a reitera cu su entrada den politica no tabata un experimento, sino un yamada cu un proposito profundo:
“Mi a haci esaki pa un conviccion cu a nace den mi curason, y te dia di awe e candela ey ta keda cendi pa nos hiba Aruba y nos partido dilanti. Hopi biaha hende ta bisa cu bo ta hoben of mucho hoben, pero mi ta kere cu e momento di Dios ta perfecto.”