E jornada di medicina preventivo organisa den cuadro di Dia di Bestia a resulta den un gran exito tanto pa e comunidad di doñonan di mascota como pa e futuro profesionalnan di medicina veterinario. Dr. Andriena Dominguez, dokter veterinario y docente na Xavier University, a expresa su satisfaccion cu e papel activo cu su estudiantenan a hunga durante e evento en colaboracion cu Clinica Contreras.
Dr. Dominguez a resalta cu e studiantenan a haya un oportunidad unico pa aplica nan conocemento den practica directa (hands-on), realisando examennan fisico completo riba cada pashent prome cu aplica e tratamento nan:
“E studiantenan a haci un hopi bon trabou: nan a haci physical examination den tur e pashentnan, a duna dewarming, vitamina, y a practica duna e vacunanan. Nan ta super contento cu nan por a participa y nos ta hopi agradecido na Clinica Contreras pa duna nos e oportunidad aki.”
E docente a splica e importancia di e evaluacion previo aki, ya cu debi na e examennan clinico controlando temperatura, e color di e (gums), presencia di carpata y e historial di prevencion contra bichi di curason, a logra identifica algun animal cu debi na nan condicion di salud no tabata apto pa ricibi vacuna e dia ey. Sinembargo, e mayoria di e mascotanan cu a asisti tabata den bon estado di salud.
E Mensahe di Dia di Bestia: Respect y Atencion
Pa Dr. Dominguez, e palabra clave cu ta defini e esencia di Dia di Bestia ta “respect”:
“A nos manera hende mester respeta y cuida e bestianan. Nan ta parti di nos famia y ta nos responsabilidad. Cuido no ta djis duna cuminda, sino duna atencion, duna amor, trece nan na veterinario y mantene nan saludabel. Esaki ta nos responsabilidad como ser humano.”
E colaboracion entre Xavier University y Clinica Contreras no solamente a brinda un alivio economico pa e doñonan di mascota den e comunidad, sino cu el a fortalece e educacion di e futuro veterinarionan cu a demostra un nivel di dedicacion y profesionalismo.