Minister Plenipotenciario di Sint Maarten, Drs. Gracita R. Arrindell, a ricibi Gobernador di Sint Maarten, S.E. Ajamu Baly, riba dialuna 14 di september 2026, durante e bishita di trabao di e Gobernador na Hulanda. E reunion aki a brinda e oportunidad pa intercambia di pensa riba varios asunto di gran importancia pa e pais.
Entre e temanan cu a wordo discuti tabata tin desaroyonan cu ta andando den cuadro di asuntonan di Union Europeo (UE), incluyendo oportunidadnan di financiamento di UE y e importancia di desaroya proyectonan cu ta cla pa inversion y pa fortalece cooperacion regional pa asina alineá cu e prioridadnan di programacion di Union Europeo den e añanan cu ta bin.
E partidonan a discuti tambe maneranan pa atende cu e ‘brain drain’ (perdida di talento/profesionalnan) y pa fortalece e lasonan cu e ciudadanonan di Sint Maarten cu ta biba na Hulanda. Minister Arrindell a resalta e esfuerzonan di Gabinete a traves di su base di dato di diaspora pa mantene e comunidad na Hulanda conecta, y pa yuda identifica y conecta candidatonan bon califica cu posicionnan clave y oportunidadnan na e isla.
E minister a resalta tambe iniciativa pa involucra e studiantenan y e proximo celebracion di Dia di Sint Maarten, cualnan ta brinda oportunidad pa mantene conexion cu e hendenan di Sint Maarten na Hulanda y pa fortalece nan participacion den e rednan di Gabinete.
E discusion a enfoca mas ainda riba e esfuerzonan di Gabinete pa haci un miho uzo di e conocemento, e experiencia y e rednan profesional cu ta disponible na Hulanda, incluyendo a traves di organisacionnan manera VNG y otro socionan, pa yuda atende cu prioridadnan clave na Sint Maarten.
E esfuerzonan aki ta dirigi pa conecta e conocemento y e recursonan relevante na Hulanda cu e necesidadnan y oportunidadnan concreto na e isla.
E reunion a reconfirma e importancia di mantene un dialogo y cooperacion continuo, como tambe e uzo efectivo di e rednan di Sint Maarten na Hulanda, pa asina apoya e prioridadnan di desaroyo di e pais.