Den un intervencion den Parlamento di Aruba, parlamentario Otami Thomasia a haci un apelacion pa husticia y igualdad pa e profesional Arubiano, criticando fuertemente e standard dobel cu ta existi den compensacion laboral ora ta trata di talento local en comparacion cu profesionalnan di exterior.
Thomasia a enfatisa cu si e pais ta dispuesto pa busca profesional exterior y paga nan un salario competitivo paso e mercado internacional ta exigi esey, no por cambia e regla ora e mesun stoel wordo ocupa pa un Arubiano.
Si un Arubiano tin e mesun preparacion, e mesun experiencia, ta carga e mesun responsabilidad y ta wordo teni na e mesun nivel di accountability, su nacionalidad no por bira e descuento riba su balor profesional,” Thomasia a declara.
E reto di atrae talento bek cas
E parlamentario a toca un punto central tocante e mensahe cu e sociedad y e clase politico ta mandando pa e hubentud cu ta bay studia den exterior. Thomasia a señala cu constantemente ta incentiva e hobennan pa bay studia, prepara y adkiri experiencia pa despues regresa Aruba, pero ora nan bin bek, e realidad laboral ta duna nan un señal contrario.
Ora nan bin bek, nos no por bisa nan indirectamente: ‘Aki bo ta bal menos.’ Esaki no ta e incentivo cu nos mester crea si realmente nos kier atrae nos talento bek cas,” e parlamentario a remarca, subrayando cu ser Arubiano no por hunga contra un profesional den su propio cas.
Palabranan historico di Betico Croes
Pa ilustra cu e situacion aki no ta un problema nobo sino uno cu ta data di tempo caba, Thomasia a trece dilanti un parti historico di e lider nacional Betico Croes di aña 1968:
“Cada Hulandes cu bin Aruba ta un Arubiano cu mester keda na Hulanda. Echlijk ta un Arubiano cu ta bay, pero den nos caso no ta un Arubiano cu ta bay, ta un Arubiano cu no por bin bek cas, cu no por sinta den e stoel.”
Basa riba e reflexion aki, Thomasia a reafirma cu e situacion aki no por continua mas y cu e balor di e Arubiano mester keda respeta.
Realidad di e mercado y e principio di igualdad
Reconociendo e limitacionnan economico di e pais, Thomasia a haci referencia na e documentonan di Utilities di aña 2013, e cual nan ta expresa e preocupacion cu Aruba tin un mercado chikito y no semper por competi directamente cu e salarionan di exterior. E parlamentario a remarca cu esey ta un realidad cu no por negosha.
Sinembargo, e parlamentario a conclui haciendo un apelacion directo na su coleganan parlamentario pa mantene e mesun liña si e pais ta capaz di haci excepcionnan financiero pa profesionalnan di afo, e mesun excepcion y trato ey mester wordo aplica pa nos propio hendenan.E Arubiano