E Comision Special pa Caribe di Parlatino, cu a wordo instala na Curaçao na mei 2026, a reuni di 10 te cu 12 di september 2026 na Santo Domingo, Republica Dominicana. Durante e reunionnan a delibera riba diferente tema di importancia pa e region di Caribe, cu enfoke principalmente riba medio ambiente y seguridad alimentario.
E reunion a cuminsa cu e parti oficial, cu discursonan di entre otro sr. Rolando González Patricio, Presidente di Parlatino, y sr. Alfredo Pacheco Osoria, Presidente di Cámara di Diputados di Republica Dominicana. Despues di e parti oficial, e comision a sigui cu su agenda di trabao.
Un di e temanan cu a hala hopi atencion tabata e fenomeno di Sargassum, cu ta afecta henter e region di Caribe y cu a kibra tur record den 2026. E comision a delibera riba e impacto di e fenomeno y e necesidad pa sigui busca solucionnan pa e desafionan cu e region ta enfrenta.
Como invitado special, Minister di Desaroyo Economico y Turismo di Curaçao, sr. Roderick Middelhof, a duna un presentacion riba e plannan y maneho di Gobierno di Curaçao pa atende cu e tema di seguridad alimentario.
Durante e ultimo dia di reunion, e comision a clousura su trabao cu un presentacion di un experto riba derecho ambiental internacional. Durante e presentacion y debate, a hala atencion riba e hecho cu, apesar cu Aruba, Curaçao y Sint Maarten tin autonomia, den e maneho di cambio climatico tin cierto aspectonan caminda consultacion of intervencion di Reino Hulandes ta inevitabel.
Entre e aspectonan menciona tabata:
Financiamiento: e necesidad pa tene cuenta cu e condicionnan ora ta haci uso di fondonan caminda Reino Hulandes ta eherce supervision financiero.
Asuntonan institucional: e reparticion di responsabilidadnan entre e paisnan y Reino Hulandes, conforme e Estatuto di Reino.
Concordancia entre sistema legal: e obligacion pa e paisnan tin cierto grado di concordancia den nan leynan, conforme e Estatuto di Reino.
E experto tambe a menciona IPKO como un plataforma util pa consultacion entre Aruba, Curaçao, Sint Maarten y Hulanda tocante medidanan di caracter general.
E ultimo deliberacion di e comision a enfoca riba aspectonan tecnico relaciona cu aplicacion y adaptacion di leynan Modelo di Parlatino den e sistemanan legal/juridico di Aruba, Curaçao y Sint Maarten.
Na final di e reunionnan, e Presidente di e Comision Special pa Caribe, e Presidente di Parlatino y e Presidente di Cámara di Diputados di Republica Dominicana a tene un rueda di prensa. Como anfitrion, e Cámara di Diputados a finalisa e programa cu un recorrido pa e miembronan di e comision den e congreso.
E delegasion di Curaçao tabata consisti di Presidente di Parlamento, sr. Fergino Brownbill, miembronan di Parlamento sr. Ramón Yung, sr. Ruisandro Cijntje y sr. Juniël Carolina, y Grefier di Parlamento, sr. Silvin Cijntje.
