un grupo nobo di Estudio Básiko di Polis i Wardakosta (Basis Opleiding Politie Kustwacht – BOPK) a finalisá ku éksito e periodo di introdukshon ‘Huntu Mas Fuerte’ di kuater siman. Ku un yegada ofisial i seremonia na e Base di Marina Parera na Kòrsou, a klousurá e promé fase intensivo aki i a inisiá ofisialmente ku e estudio di dos aña.
E grupo nobo ta konsistí di 23 aspirante: 13 aspirante di Wardakosta, sinku di Kuerpo Polisial Hulanda Karibense (KPCN) i sinku di Kuerpo Polisial Sint Maarten (KPSM). E formashon konhunto aki ta enfatisá e kolaborashon entre e diferente servisionan den e parti Karibense di Reino.
Durante ‘Huntu Mas Fuerte’, desaroyo personal, resistensia físiko i mental, kolaborashon, disiplina i abilidatnan profeshonal tabata sentral. Durante kuater siman, e aspirantenan a traha riba nan desaroyo individual i, prinsipalmente, a siña traha komo un tim.
A finalisá e periodo di introdukshon ku un treinen final. Despues di esaki, e aspirantenan a regresá huntu na e Base di Marina na Parera. Na yegadá, a risibí nan segun tradishon ku un aplouso di bonbiní, e asina yamá ‘binnenklappen’.
Durante e próksimo dos añanan, e aspirantenan lo sigui risibí formashon i preparashon pa nan futuro trabou na Wardakosta i e kuerponan polisial. Den e fase aki lo sigui traha riba konosementu profeshonal, abilidatnan operashonal, integridat, kolaborashon i e kapasidat pa aktua di manera profeshonal bou di diferente sirkunstansia.
Kuerpo Polisial Hulanda Karibense, Kuerpo Polisial Sint Maarten i Wardakosta Karibe Hulandes ta deseá tur aspirante hopi éksito ku nan formashon i desaroyo. Huntu nan a pone awe un paso importante den direkshon pa un futuro den kua nan ta dediká nan mes na seguridat i mantenshon di lei i órden den e área Karibense.
