Fundacion SIKI e plataforma cu ta representa e bos di e pashentnan na Aruba, a expresa su profundo preocupacion relaciona cu e ultimo declaracionnan publico tocante e situacion financiero di e hospital nacional. E fundacion, encabesa pa e presidente y hurista Jayburtt Dijkhoff, ta cuestiona fuertemente e maneho di e recursonan y ta exigi pa pone prioridad bek riba e bienestar y atencion di e pashent.
Segun e fundacion, e discurso cu gobierno no ta percura pa suficiente recurso financiero y cu tin un deficit structural cu ta stroba e garantia di cuido, ta lanta interogativo serio riba e transparencia y e manera cu a maneha e recursonan den e sector aki. Si realmente tabatin un bon maneho cu placa di pueblo.
Buraco financiero y e berdadero prioridad di e pashent
E plataforma ta cuestiona abiertamente con un institucion di salud por yega na un buraco financiero cu ta alcansa casi un miyon florin pa luna. SIKI ta señala cu durante e ultimo añanan a tuma luga incursion nan y inversionnan grandi den e infrastructura y edificio di hospital pa crea un ambiente mas moderno y bunita. Sinembargo, e fundacion ta mustra cu no ta cla si e prioridad supremo cual mester ta e pashent y e calidad di su atencion medico a ricibi e mesun nivel di atencion y recurso.
Aunke SIKI ta reconoce cu e poblacion di Aruba a crece y cu e demanda pa servicio di cuido a aumenta significativamente, e organisacion ta remarca cu falta un mecanismo transparente caminda e instancianan concerni ta rindi cuenta detaya di con e florinnan y e recursonan publico ta wordo gasta.
Fundacion SIKI ta enfatisa cu tin un desatencion preocupante den areanan sumamente sensibel y delicado di nos salud publico, cu no por wordo reduci ni ignora na simpel cifranan:
Enfermedadnan cardiovaskular: Falta di recurso y atencion adecuado pa trata e condicionnan aki debidamente.
Cuido di cancer: Deficiencia y falta di e screening necesario pa combati un di e causanan di mortalidad mas halto den nos comunidad.
Adultonan mayor: Falta di e sosten moral y e cuido specialisa cu nos grandinan mester, kendenan hopi biaha ta sinti nan mes bandona ora nan ta keda hospitalisa.
Den e mesun liña aki, e fundacion ta recorda e historial di e proyecto di renobacion di hospital, cu su costo nan a duplica y triplica sin un control estricto ni un rendimento di cuenta transparente pa e pueblo di Aruba. SIKI ta adverti cu e mesun patronchi aki ta parce di ta ripiti su mes awe den e servicio- y recursonan di salud.
Pa e motibo aki, e plataforma lidera pa Jayburtt Dijkhoff ta haci un yamada urgente pa establece un dialogo transparente e intersectorial. E mesa di dialogo aki mester envolvi tur e socionan den cuido di salud, e Departamento di Finansas, e pueblo y, mas cu todo, e pashentnan mes.
E meta di e dialogo aki mester ta pa establece claramente unda e berdadero prioridadnan ta keda, reconoce e limitacionnan existente y busca solucionnan mas humano, husto y efectivo pa e comunidad completo. No por dies bisa mester di placa, mester mustra y duna cuenta dicon tin mester di mas placa y kico ta e prioridadnan robes cu a scoge den maneho di hospital cu awe tin un situacion di preocupacion asina grandi un biaha mas na hospital.