Hulanda a apstené di vota riba e resolushon presentá pa Ghana den kua ta deklará sklabitut e krímen di mas horendo kontra humanidat. Parlamentu a bin ku un moshon ku básikamente ta pidi Hulanda respetá nos i trata nos komo partner igual. Den e moshon ta proponé pa usa artíkulo 38 insiso 1 di Statuut pa via un Areglo Mutuo regla e rèspèt i igualdat ei. Pa medio di un Areglo Mutuo lo mester “deliniá proseduranan tokante kon ta yega na desishonnan i atendé ku kriterionan ora ta determiná posishon di reino den kuadro internashonal”.
Despues di 5 siglo kolonia di Hulanda, 5 siglo den un relashon di desigualdat, e afamado defisit demokrátiko persistente, 7 dékada di Statuut di reino, 5 lei di konsenso, un areglo mutuo ku a silensiá parlamentu pa 9 aña pa loke ta ehekushon di Landspakket, e despensa “fake” di Rutte ku ta papia di un “komma” enbes di un “punt” i e pordon mas “fake” ainda di rei i awor apstenshon di votashon riba resolushon di Nashonnan Uní, ainda parlamentarionan di Kòrsou ta kere ku por logra igualdat i rèspèt di polítikonan hulandes!
Regla rèspèt mediante artikulo 38 insiso 1 ta tantu bal. Rèspèt bo por haña i eksiguí ora bo ta partner igual. Siendo partner no igual hamas bo por risibí ni eksiguí rèspèt. Statuut no tin artíkulo ku ta konsiderá Kòrsou, Aruba i Sint Maarten partner igual. Artikulo 41 ta bisa:
Insiso 1: Nederland, Curacao, Aruba en Sint Maarten behartigen hun eigen belangen.
Insiso 2 ta bisa: De belangen van het Koninkrijk zijn mede een voorwerp van zorg voor de landen.
Pues interes di reino/Hulanda tambe kada pais mester sirbi. Ke men ku tur kos por sosodé tur kaminda pero mester pone interes di reino/Hulanda na promé lugá.
Statuut ta bisa ku pa asuntunan ku ta “raak” òf “ga aan” Kòrsou manera entre otro kambio di Konstitushon hulandes, Defensa i Asuntunan Internashonal di Reino/Hulanda mester “tende” Kòrsou. Tende ke men “horen”. Esaki ta nifiká ku promé ku Hulanda/Reino disidí algu nan ta djis skucha loke Kòrsou tin di bisa òf opiná riba e asuntu. Nèt nèt nada mas ku esei. E desishon di Hulanda no ta dependé di e resultado di e “horen”/tendementu di Kòrsou. E desishon di Hulanda ta kompletamente lòs riba su kurpa. Pasobra artíkulo 5 di Statuut ta duna órganonan di Hulanda outoridat pa aktua internashonalmente komo órgano di reino. Pues nan ta papia tambe na nòmber di Kòrsou.
E opinion di Hulanda den Nashonnan Uni tokante apstenshon pa vota ta konta tambe pa Kòrsou. Nashonnan Uní no konosé Kòrsou. Pues Kòrsou komo kolonia hulandes tambe a apstené. Loke Kòrsou ta pensa tokante sklabitut ku ta e krímen mas horendo di humanidat, no ta konta i no ta relevante pa Hulanda. Hulanda a vota kuidando interes/imagen di Hulanda.
E minister di asuntunan eksterior di Hulanda a ninga di duna komentario riba e moshon. E ta na altura di e moshon, pero e ta haña ku no ta na su ministerio pa reakshoná riba e moshon. Sí e ta bisa ku e komunikashon rondó di e “bewuste VN-stemming” por a bai mihó. E aktitut akí di e minister ta papia palabra bon kla.
E reakshon ku a resultá den e moshon aki di parlamento ta laga nos kòrda riba e famoso kalimero. E ta lamentá di ta haña trato inhustu, pero ta skohe pa keda den e situashon hañando trato inhustu. E no ta buska moda di liberá su mes dor di lòs su mes i sali for di e inhustisia.
Hulanda ta kontentu ku e moshon wall to wall. Hulanda ta haña konfirmashon ku gobièrnu di Kòrsou i parlamentu ta di akuerdo ku Statuut, 5 lei di konsenso, Areglo Mutuo, presensia di gobernadó. Uniko kos ku Kòrsou ke ta pa Hulanda kumpli kabalmente ku Statuut: Ora algu ta “raak” nos, mester tende nos i ora algu ta “ga”nos”aan”, por fabor tende nos.
Pidi Hulanda manda e opinion di Kòrsou tambe pa Nashonnan Uní ta superfluho i no ta kuadra ètòl. Dikon? Hulanda ta papia den Nashonnan Uní pa Hulanda, Kòrsou, Aruba i Sint Maarten. Pa Nashonnan Uní Kòrsou no ta eksistí. Ta Hulanda ta eksistí komo reino. Parlamentu di Kòrsou ta hasi Kòrsou ridíkulo den bista di Hulanda i di mundu kompletu. Loke Kòrsou mester lucha p’e, no ta pa pidi Hulanda rèspèt, pero pa lucha i forga rèspèt pa haña un status rekonosé den Nashonnan Uní i esei ta Independensia. E ora ei bo mes ta den Nashonnan Uní pa ekspresá bo opinión bon kla. Aworaki ta Hulanda ta papia pa Kòrsou den Nashonnan Uní.
Komo pais independiente nos mes ta krea nos relashonnan internashonal i di diplomasia (segun e deseo den e moshon) i nos lo no tin di dependé di i roga Hulanda pa nos ta riba plataformanan internashonal manera Nashonnan Uní. Ta dikon nos polítikonan ta preferá di sigui chambuká den reino? Un reino ku den práktika ta igual na Hulanda.