Baila ta mucho mas cu solamente move riba ritmo di musica. E ta un manera pa conecta, disfruta, mantene curpa activo y comparti momentonan special hunto. Cu e pensamento aki, Centro di Bario Noord ta presenta “BAILE PA DOS,” un curso di baile specialmente prepara pa pareha cu ta desea siña pasonan nobo y pasa un dushi anochi hunto.
E curso ta wordo facilita pa e conocido instructor Erwin Croes, kende durante e periodo di les lo guia e cursistanan paso pa paso den diferente disciplinanan di baile. E programa ta brinda un combinacion variado di ritmo y estilo, haciendo cu tin algo pa cada pareha cu gusta musica y baile.
Erwin tin un trayectoria largo den mundo di baile na Aruba. El tabata parti di e prome grupo di baile di Centro di Bario Noord (CBN) durante e tempo di Watapana Festival. Mas despues, el a dirigi e grupo di Baile di Cinta y Dera Gay di CBN.
Durante 10 aña, Erwin a duna les di baile na St. Anna School, y a prepara hopi mucha pa nan fiesta di quinceañera. Su amor y dedicacion pa baile a hiba su experiencia mas leu, unda el a forma parti di diferente grupo di baile, incluyendo Aruba Dance Formation, grupo cu el a pertenece durante 30 aña.
Cu Aruba Dance Formation, Erwin a presenta den diferente hotelnan durante anochi y tambe durante Bon Bini Festival. Su trayectoria artistico a hib’e y e grupo pa diferente paisnan y destinacionnan, incluyendo Hulanda, St. Maarten, Paraguay y North Carolina, unda nan a representa Aruba cu nan talento y pasion pa baile.
Cu su experiencia di tanto aña, Erwin Croes ta sigui comparti su conocemento y amor pa baile cu e siguiente generacion.
Y asina tambe participantenan lo tin oportunidad pa siña y practica Wals, Mazurka, Tumba, Son Montuno, Bolero, Merengue, Salsa y Bachata durante e 11 siman di curso. E variedad di ritmo ta permiti cu e cursistanan no solamente siña tecnica y pasonan nobo, pero tambe descubri diferentes manera pa move hunto como pareha.
“BAILE PA DOS” ta cuminsa 23 september 2026 y ta continua te 2 december 2026. E lesnan ta tuma luga un biaha pa siman, tur diaranson di 7:00PM – 8:30PM ofreciendo un momento ideal durante siman pa sali for di rutina, topa cu otro parehanan y disfruta di un ambiente social y alegre.
E participacion ta solamente Afl. 150.00 pa pareha. Pa garantiza un ambiente agradabel y suficiente atencion pa cada participante, e curso ta limita na 20 pareha, cu un maximo di 25 pareha.