Fraccion MAN-PIN den Parlamento a evalua e situacion actual di e playanan y costa di Curaçao. E evaluacion ta mustra cu, (1) banda di e playanan cu por yega na dje via caminda publico, (2) tin hopi parti di nos costa y playanan cu ta keda rondona pa tereno priva, un herencia cu tin su rais den tempo colonial di WIC.
Di e playanan cu por yega na dje via caminda publico, hopi ta carece di un accesibilidad real pa un gran parti di nos pueblo. Esaki ta pasa ora cu stoel, parasol y instalacionnan comercial ta wordo poni riba playa di tal manera cu casi no ta keda espacio pa e hende cu ta bin cu su serveta y su jug.
Pa e playanan cu meste pasa riba tereno priva pa yega na dje, hopi biaha meste paga entrada, o simplemente no por pasa bao di ningun condicion.
E situacion aki ta crea un barera pa comunidad y ta limita e derecho fundamental pa disfruta di nos rikesa natural: nos playanan y nos costa.
Categorisacion di playanan
Pa protege nos playanan y costa, Fraccion MAN-PIN ta propone pa reparti tur playa den 5 categoria:
*Playa natural: Prioridad: naturalesa, proteccion di flora y fauna. Ningun actividad comercial, a menos cu ta pesca tradicional.
*Playa di trankilidad: Prioridad: recreo publico trankil y calmo. Actividad comercial sumamente limita (por ehempel facilidad di baño).
*Playa di recreo: Prioridad: recreo publico y oportunidad pa empresarionan local. Permiso y condicionnan meste ta bon defini.
*Playa turistico: Mas oportunidad pa actividad comercial, pero semper den capacidad di e playa, cu stipulacion di un maximo cantidad di bishitante.
*Playa multifuncional balansa: Combinacion di pesca (playa di piscador), recreo, turismo y empresariado local.
Proposicionnan pa mehora acceso publico
Pa yega na un sistema husto y duradero, Fraccion MAN-PIN ta propone entre otro:
*Padinan y control: Minister di VVRP meste identifica e padinan y preveni e meyeo o blokeo ilegal di acceso na costa y playa.
*Cumpra tereno priva: Gobierno meste cumpra parti di e tereno priva pa crea acceso publico na playa.
*Introduci “publieke erfdienstbaarheid”: Un mecanismo legal pa garantisa cu pueblo por pasa riba tereno priva pa yega na playa sin obstaculo. MAN-PIN pronto lo presenta un ley di iniciativa pa crea e posibilidad aki.
Rol di gobierno
Den evaluacion, Fraccion MAN-PIN a constata cu Minister di GMN meste cuida e maneho di medio ambiente y naturalesa; Minister di VVRP meste cuida e maneho di construccion riba tera y den lamper; Minister di MEO meste maneha actividad comercial via un “standplaatsenbeleid” balansa, no e modelo cu el a presenta cu ta comercialisa tur playa sin tene cuenta cu naturalesa, medio ambiente y reglanan di construccion. E maneho introduci pa Minister Middelhof no ta salbaguardia autenticidad, ni naturalesa, ni accesibilidad real na nos playanan y a ignora e autoridad di su coleganan minister.
Conclusion y yamada publico
Fraccion MAN-PIN ta mustra cu Curaçao meste avansa cu un maneho cla pa crea y protege acceso publico na playanan, elimina bareranan innecesario, y garantisa cu tur hende por disfruta di nos costa.
Nos ta invita comunidad, organisacionnan no-gubernamental (NGO’s) y sector priva pa contribui den e dialogo pa yega na un solucion duradero pa nos costa y playanan.