Den un reciente declaracion, Minister di Finansa, Geoffrey Wever, a expresa cu prome cu Gobierno sigui cu e proceso di revision di e Ley di Normering Topinkomens (LNT), e ta acerca Parlamento pa tende su opinion, brindando espacio pa deliberacion amplio, transparencia y debido control parlamentario.
E posicion aki sinembargo, ta drenta den contradiccion directo cu e decisionnan anterior di Gobierno riba e mesun ley di LNT y cu e manera cu e Minister ta atendiendo cu e tema di Rijkswet HOFA.
Parlamentario di fraccion di MEP, drs. Shailiny Tromp-Lee, a cuestiona e falta di consistencia aki: “Ta haci un hende duda si ta di berdad e mesun Minister ta atende e temanan aki. Dicon pa e propuesta di revision aki e Minister ta papia di transparencia y debido control parlamentario, pero e no a bin Parlamento pa pidi gevoelens di representantenan di pueblo ora Gobierno a haci un excepcion di LNT pa Aruba Airport Authority (AAA), permitiendo salario te cu 3 biaha mas halto cu e norma di ley? Dicon e ora ey opinion di Parlamento no tabata importante?”
Ademas, Tromp-Lee a indica cu e mesun falta di transparencia ta wordo observa den e caso di Rijkswet HOFA, unda e dialogo y participacion di Parlamento te cu awe no a tuma luga. Esaki ta bay directamente contra loke a wordo acorda den Interparlementair Koninkrijksoverleg (IPKO), caminda a dicidi y subraya cu den e proceso di un Consensus Rijkswet, Parlamento mester keda debidamente envolvi den tur fase: prome, durante y despues di e negociacionnan, y mester tin consensus di Parlamento na tur momento.
“Nos ta observando un transparencia selectivo y segun ta conveni. Debido control parlamentario y respet pa representantenan di pueblo no por ta un instrumento cu un Minister ta uza solamente ora e ta conveni’e, y nenga di aplica den asuntonan unda ya caba a haci excepcion salarial masivo of den asuntonan di gran importancia nacional manera HOFA,” Tromp-Lee a enfatisa.
E Parlamentario a conclui cu debido proceso legislativo y respet pa Parlamento mester wordo aplica sin excepcion y cu berdadero seriedad. “Aruba merece un liderazgo cu ta actua cu e mesun seriedad, transparencia y firmeza den tur tema, y cu no ta uza Parlamento solamente pa cubri su posicion ora e ta sinti cu ta necesario.”
Segun Tromp-Lee e mascarada di Futuro su mandatario y parlamentarionan ta keda cay mirando nan uzo di palabranan bunita cu no ta keda refleha den nan accionnan.