Gobierno di Aruba a tuma nota di e decision di Corte den e caso entre ABC y Pais Aruba, relaciona cu e balans entre proteccion di naturalesa y actividadnan den sector turistico.
Den su decision, Hues ta señala cu mester tene cuenta cu tur e interesnan envolvi: e interes di ABC pa proteccion di flora y fauna den areanan cu ta protegi pa ley, e interes di tour operators pa continuidad di nan actividadnan, e responsabilidad di Gobierno di Aruba pa proteha areanan natural legalmente designa, y e interes general di comunidad Arubiano. Hues ta enfatisa importancia di logra un bon balans entre conservacion di naturalesa y industria turistico.
Pa crea espacio pa un solucion rasonabel y ehecutabel, Hues a decidi pa pospone tratamento di e caso pa 5 siman, te diahuebs 15 di october 2026 pa 2:00 p.m.
Como condicion, Pais Aruba mester determina ainda awe un fecha y ora durante e siman cu ta bin pa sinta na mesa cu ABC, como partido demandante den e procedimiento, den un dialogo constructivo y, si ta necesario, tene mas cu un reunion.
Hues a expresa cu tur partido, incluyendo tour operators, mester demonstra disposicion pa acerca otro y contribui na un solucion cu ta tene cuenta cu e diferente interesnan y cu por funciona den practica.
Gobierno di Aruba ta respeta e decision di Corte y ta comprometi pa cumpli cu e indicacionnan duna. Gobierno ta sigui considera dialogo como e mihor caminda pa logra un solucion cu ta proteha nos naturalesa, mientras cu na mes momento ta tene cuenta cu actividad economico y e interes general di Aruba.