E Lider di Partido Pueblo Progresivo (PPP), Sr. James Finies, lo laga tende e bos di Bonaire den e region Caribense durante e historico di Tres Conferencia Regional di CARICOM tocante Reparacion na Barbados. Sr. Finies ta compaña pa Sra. Davika Bissessar Shaw, Presidente di Bonaire Human Rights Organization (BHRO), cual ta Miembro Asocia di e Comision di Reparacion di CARICOM.
E conferencia di cuater dia ta reuni lidernan prominente di Caribe y di mundo, academiconan y defensornan di reparacion, incluyendo Profesor Verene Shepherd, Sir Hilary Beckles, Prome Minister Mia Mottley y ex-Prome Minister Ralph Gonsalves, entre otronan.
E prome conferencia regional a tuma luga na St. Vincent y Grenadines na september 2013, sigui pa e di dos na Antigua y Barbuda na september 2014. Awor Barbados ta anfitrion di e di tres conferencia, di 17 te cu 19 di september, continuando cu e esfuersonan di e region Caribense pa avansa e caso internacional pa Husticia Reparativo.
E contribucion di Bonaire, haci pa Sr. Finies y Sra. Bissessar Shaw na e “CARICOM 10-Point Plan” pa Husticia Reparativo, ta forma parti di e trabou cu lo wordo relansa durante e conferencia. Nan a percura pa pone colonialismo, cu a keda existi, claramente dentro di e marco di reparacion, enfatisando cu pa teritorionan manera Bonaire, husticia reparativo no por wordo separa di e proceso ainda no termina di descolonisacion.
Durante e conferencia, Sr. Finies lo duna un discurso tocante e historia di Bonaire y e experiencianan di su pueblo di descendencia Africano, incluyendo Africanonan esclavisá cu tabata victima di e traficacion transatlantico di personanan esclavisá, cual recientemente Nacionnan Uni a declara como e crimen di mas grave den historia di mundo.
E intervencion di Finies lo resalta tambe e importancia historico di Bonaire pa e economia colonial Hulandes, particularmente pa medio di su industria di salo. E salo di Bonaire tabata un producto di hopi balor cu e Hulandesnan tabata usa, entre otro, pa conserva hering, cu e tempo ey historicamente tabata considera como “oro blanco”.
Tras di e rikesa economico aki tabata tin e trabou forsa y e sufremento di nos ancestronan Africanonan esclavisá cu tabata traha bao di condicionnan duro y inhumano den e saliniñanan di Bonaire, tambe conoci como “e fierno blanco”. Nan trabou a contribui na e economia colonial, miéntras cu nan tabata priva di nan libertad, dignidad y control riba nan mesun bida.
BHRO y PPP ta kere cu e historia aki mester forma parti di e discusion mas amplio Caribense y internacional tocante husticia reparativo. Consekuentemente, e participacion di Bonaire na e conferencia di reparacion na Barbados ta combina dos asunto cu tin un conexion estrecho cu otro: reparacion pa e inhusticianan historico infligi na personanan di descendencia Africano, y e derechonan di e pueblo di Bonaire.