CuracaoFeatured

No tin inklushon di konseho di nos Raad van Advies i Raad van State: Mester trese kambio den COHO 2.0

Trayecto

Puntonan ku tabata puntonan di atenshon i di prekupashon pa e gobièrnu anterior ku MAN tabata forma parti di dje.

Djárason último Konseho di Partido MAN a fiha  posishon di Partido MAN riba e lei COHO 2.0 ku aktualmente ta na Parlamento pa keda tratá. Despues di un análisis interno i profundo, pero tambe tumando nota di diferente presentashon di ekspertonan den nos komunidat, partido MAN a fiha su posishon. 

MAN komo organisashon polítiko sosial demókrata ta mira desaroyo kontinuo di e hende komo parti di nos komunidat. E desaroyo aki mester ta unu kaminda dignidat humano i hustisia sosial ta sentral.

E pandemia di COVID-19 a dal nos pais finansieramente hopi duru i a bòltu tur espektativa i trabounan ku tabata tuma lugá, pa logra un pais mas eksitoso, sigur kaminda ku pa aña 2020  Kòrsou lo a konosé un presupuesto balansá i tabata riba kaminda pa un presupuesto ku “surplus”. 

Gobièrnu di Kòrsou den su esfuerso pa yega na un solushon pa su hendenan ku a kai den un nesesidat grandi, a aserká Hulanda ku petishon pa un fiansa. Hulanda a bai di akuerdo pa duna Kòrsou e fiansa. Ku e fiansa di Hulanda gobièrnu di Kòrsou por a garantisá pago di salario di su empleadonan den sektor públiko, duna supsidio pa pago di salario den sektor privá i sostené empresarionan chikí (ZZP’ers). Na e fiansa Hulanda a mara diferente kondishon. Gobièrnu di Kòrsou a bai di akuerdo ku sierto di e kondishonnan. Un di e kondishonnan ku Hulanda a bini kuné tabata e konsepto di lei di konsenso CHE. Gobièrnu di  Kòrsou, no por a bai di akuerdo ku e konsepto di lei di konsenso CHE manera e la keda presentá. Motibu pa esaki ta, ku e konsepto aki no tabata kuadra ku e espíritu di Statüt, ku ta retardo responsabilidat pa asuntunan interno i outonomia. 

Despues di esaki a sigui un proseso di deliberashon ku Hulanda te ku a yega na un akuerdo, e asina yama “Onderlinge regeling” di Landspakket i e konsepto di lei di konsenso COHO. E akuerdo pa lokual ta trata COHO tabata enserá pa e konsepto di lei di konsenso COHO a bai Raad van State pa konseho huntu ku e puntonan di preokupashon di nos órgano di konseho lokal, Raad van Advies riba e konsepto anterior di lei di konsenso CHE. 

Pa partido MAN ta sumamente importante  desaroyo pa nos komunidat riba tur área i no únikamente e áreanan di reforma. Pa e motibu aki partido MAN a traha duru pa hinka e “O” di Ontwikkeling (desaroyo) den e konsepto di lei aki. Tur e esfuersonan aki ta pa garantisá kontinuidat di funshonamentu di nos pais i bienestar di nos hendenan.

Despues di resultado di elekshon di 19 di mart 2021 e ròl di partido MAN den gobernashon i e trayekto pa inkluí konsehonan di Raad van State i nos Raad van Advies den e konsepto di lei di konsenso COHO a kaba, na momentu ku partidonan MFK I PNP a pidi pa para tur proseso di negoshashon.

 Na luna di febrüari 2022 Parlamento di Hulanda, Kòrsou, Aruba i Sint Maarten a risibí e dokumento final di e konsepto di lei di konsenso COHO 2.0. Esaki despues ku Gabinete Pisas i Gobièrnu di e otro paisnan den reino a yega na konsenso riba e lei. Partido MAN ku tin representashon den Parlamento di Kòrsou a formulá su pensamentu riba e konsepto di lei aki teniendo primeramente kuenta ku su posishon ideológiko. Seguidamente a hasi uso di konsehonan di Raad van State, Raad van Advies di Kòrsou i Raad van Advies di Aruba i esun di St. Maarten, pa duna mas supstansia na MAN su posishon i pensamentu. Otro aspekto importante ku a tene kuenta kuné den e análisis di e konsepto di lei ta desaroyo di e komunidat i e kompromiso ku lo traha riba e diferente kondishonnan básiko, pa garantisá desaroyo di nos pais.

Den nos análisis nos a yega na diferente puntonan kual pa nos ta di atenshon i ku mester trese kambio. E punto nan ta: 

E puntonan di atenshon den e konsepto di lei di konsenso COHO ta:

  • Kompromiso Finansiero di Hulanda
  • Kontenido na “O” di ontwikkeling (desaroyo)
  • Poder di Minister BZK pa duna instrukshon na COHO
  • Miembro di kada pais den COHO
  • Kriterio pa paro di supsidio
  • Kroonberoep – Opheshon
  • Fortifikashon di nos aparato públiko
  • Relashon di COHO i CFT
  • Ownership di e paisnan
  • Funshonamentu di COHO komo órgano di sosten i supervishon den un órgano

Pa MAN e puntonan ariba menshoná no ta únikamente fundamental, pero tambe nesesario pa protehá e espíritu di nos Statüt ku ta responsabilidat pa asuntunan interno i outonomia. 

MAN ta optimista i ta di opinion ku esaki ta un oportunidat di oro pa nos hala mara pa demostrá “ownership” i liderazgo pa evitá kua ta mina nos outonomia hasiendo mal uso di e pandemia COVID-19 ku a sorprendé henter mundu.
Un base di koperashon no por nifiká ku mester mina outoridat di un pais. E base di koperashon ku Hulanda mester ta ku Kòrsou tin di bisa riba e diferente áreanan di reforma i direkshon di desaroyo di nos pais i nos pueblo. Gobernashon den su totalidat mester ta dirigí riba Alsa nos Nashon.Pa nos komo Kòrsou aliansa kambionan den e lei tin pasonan ku nos parlamento mester enkaminá pa nos por logra. Basa riba esaki nos a trese rekomendashon kual nos frakshon den Parlamento tambe lo buska sosten riba dje.

Puntonan di rekomendashon ta:

  1. Pa Parlamento di Kòrsou yega na un posishon unánime pa bini ku amiendanan ku ta inkluí e puntonan di atenshon ariba menshoná den e konsepto di Lei di Konsenso COHO.
  2. Pa Parlamento di Kòrsou den su relato, inkluí opheshonnan di grupo i gremionan den nos komunidat relashoná ku Lei di Konsenso COHO.
  3. Pa Parlamento di Kòrsou aserká Parlamentonan di Aruba i di St Maarten pa sostené inklushon di amiendanan menshoná bou di punto 1 den e konsepto di Lei di Konsenso COHO.
  4. Pa Parlamento di Kòrsou urgi Tweede Kamer i Eerste Kamer pa no aprobá e konsepto di Lei COHO sin ku e puntonan menshoná bou di punto 1 keda inkorporá den e konsepto di e lei.

E konsepto di Konsenso COHO 2.0 ku tin aktualmente riba mesa mester bini kambio kaminda ta salbaguardiá tur e puntonan ariba menshoná. Ta importante pa un koperashon den Reino funshoná na interes di e pueblonan i no bai bira un periodo di diskushon i amargura ku lo no yuda Adelanto di nos pueblo.

Related posts

AZV ta informa: Aseguradonan di AZV no por drenta Colombia sin ta dobel vacuna

EA News Author

Gabinete Wever-Croes a reconoce señor Hubert Tiel

EA News Author

Despues di tres condicion a cambia pa 8 pero ni Aruba, Corsou y Sint Maarten a acepta esaki

EA News Author

Leave a Comment

Whatsapp Message