Awe mainta Hues a dicta sentencia den e caso LAR cu e companianan Friendly Green Bike (Green Bike) y Evikes Corporation (Evikes) a cuminsa contra Gobierno. Por a compronde cu Hues a rechaza e demanda di Green Bike y Evikes.
E companianan Bike y Evikes a wordo representa pa abogado mr. de Lange mientras cu Gobierno a wordo representa pa mr. Gravenstijn.
Ta asina cu Green Bike y Evikes a cuminsa e caso pa pidi Hues pa suspende e demanda di Gobierno di 29 Juni 2026 riba Green Bike y Evikes . Ambos compania a protesta contra e demanda aki. E demanda ta mas bien un multa cu Gobierno ta pone riba Green Bike y Evikes pa no ta cumpli cu e reglanan stipula pa Gobierno esta cu mester tin permiso pa ta huur steps y bicicleta di coriente, cual permiso e companianan no tin.
EVALUACION DI HUES
Hues den su evaluacion ta mustra cu Green Bike y Evikes a pidi Hues pa suspende e multa di Gobierno pa un periodo di 6 luna, despues cu tin un decision definitivo riba nan perticion pa haya permiso di huur di e steps y biciletanan electronico. E companianan ta mustra cu si no suspende e demanda di Gobierno, lo perhudica nan financieramente pasobra clientenan no por haci uso di nan servicio.
Di banda di Gobierno a wordo mustra cu Hues mester rechaza e peticion di e companianan pasobra no tin motibo di urgencia. Gobierno ta haya cu Gobierno mester actua pasobra aki ta e seguridad den trafico ta core peliger.
Hues den su evaluacion ta mustra cu e ley di transporte publico ta mustra cu ta prohibi pa ta huur vehiculonan sin cu tin e permiso di e Minister di Transporte y Comunicacion. Hues ta mustra tambe cu e ley ta bisa cu si no ta cumpli cu e reglanan, por impone multa.
DECISION DI HUES
Hues ta haya cu no tin un motibo di urgencia manera Green Bike y Evikes a bisa pa cu e situacion financiero. Na opinion di Hues, e documentonan cu Green Bike y Evikes a presenta ta duna e impresion cu e situacion di ambos compania ta bao di presion.
Sinembargo e documentonan no ta duna un bista cla riba cual momento e companianan no por cumpli mas cu nan obligacionnan financiero. Hues tambe ta mustra cu e interes di e companianan Green Bike y Evikes no ta pisa mas cu e interes general cu ta encera cumpli cu e deber di tin permiso y e seguridad di trafico.
Hues a rechaza e demandanan di Green Bike y Evikes.