Den un declaracion conmovedor y directo, Susanita La Bella, propietario di e proyecto ‘Merere’ den centro di Oranjestad, a expresa su profundo desapunto y frustracion pa e falta di apoyo di gobierno, e obstaculonan burocratico y e falta di un permiso di construccion despues di aña di esfuerso y inversion di miyones di florin.
Na Spaño tin un dicho: Me he quedado como novia de pueblo, vestida y alborotada,” La Bella a declara, enfatisando cu despues di aña di promesa y promocion pa e revitalisacion di centro di ciudad, e realidad pa e inversionistanan local ta completamente diferente.
Promesanan pa centro di ciudad vs. e restriccionnan di e licencia
La Bella a señala cu entre 2021 y 2026, Minister di Asunto Economico, Geoffrey Wever, a haci un minimo di 15 apelacion publico pa atrae inversionista y promociona e revitalisacion di Oranjestad, primintiendo un guia di inversion transparente y facilitando e proceso pa proyecto di vivienda, condominio y gastronomia.
Sinembargo, e realidad cu e propietario a topa cune ora el a ricibi su licencia tabata yen di restriccion. E condicionnan nobo ta exclui e huur turistico di tur dia (short-term rentals), e construccion di condominio y e conversion di edificionan existente pa e uzonan ey den centro.
Con e mensahe aki ta cuadra cu e restriccion di e licencia aki?” La Bella a cuestiona. “Nos no ta papia di un inversion di 100,000; nos ta papia di miyones di florin. Restaura edificionan bieu ta costa placa serio. Si proyectonan similar a wordo permiti prome, kico e inversionistanan nobo mester haci pa haya e licencianan ey?”
Tambe ta adverti tambe cu e tipo di restriccionnan aki ta stroba e acceso na financiamiento bancario, cerando e caminda pa e desaroyo economico cu e mesun gobierno ta afirma cu e kier stimula.
Aña di espera pa e permiso di construccion di ‘Merere’
Un di e puntonan mas critico di su declaracion tabata e retraso pa e permiso di construccion pa e proyecto ‘Merere’, un proceso cu ta andando for di aña 2021. La Bella a recorda Minister Wever cu e mes tabata na altura di e caso aki for di principio den su rol anterior como abogado fiscal di real estate.
A pesar di a cumpli cu tur e procedimentonan y di a inverti miyones di florin, ‘Merere’ ta keda cera y den pausa pa falta di e permiso di construccion.
Esaki ta e aña 2026, ta september, e ta cera, mi no por habri,” e propietario a expresa. “Mi a sufri di berdad pa 4 aña… E ta cera, e ta pausa y probablemente mi no ta bay habri.”
“Centro no ta Wilhelminastraat so”
La Bella a cuestiona fuertemente e enfoke di e plan di revitalisacion di gobierno, indicando cu pa medio di un analisis di e discursonan di e minister, a resulta cu Wilhelminastraat a wordo menciona 13 biaha, mientras cu e areanan rond di dje a wordo ignora.
Centro no ta Wilhelminastraat so. Ami ta centro. Rancho ta centro. John G. Emanstraat ta centro. Kerkstraat ta centro. Henriquezstraat ta centro,” La Bella a remarca.
El a detaya con el a haci esfuerso personal y financiero pa limpia, bunitesa y mantene e area di Kerkstraat sigur sin ricibi apoyo gubernamental, enfrenta constantemente problemanan di Insiguridad y falta di mantencion di e espacio publico.
Un apelacion pa e yiu di tera y e orguyo cultural
E proyecto ‘Merere’ a wordo concibi pa funciona como e Plaza Cultural di Ciudad pa Aruba (Aruba’s Cultural City Square), un espacio diseña pa e arubianonan sinti orguyo di nan identidad y cultura.
A pesar di e desatencion y e problemanan di siguridad cu e area ta enfrenta, La Bella a gradici e comunidad di Aruba pa e apoyo incondicional cu el a ricibi for di e tempo di e pandemia di COVID-19 te cu awe.
Mi pregunta ta: pa ken nos ta haciendo e, minister? Nos ta desaroyando centro pa nos yiu di tera?” La Bella a concluye. “Mi no tin miedo di bin awe pasobra mi no tin nada mas di perde, y mi no ta acepta esaki… Mi ta un inversionista cu ta stima Aruba y cu kier genera orguyo pa nos hendenan.”