Señor Lee ta e miembro pa Aruba den Raad van State na Hulanda
ORANJESTAD – Siguiendo cu reunionnan planea durante su biahe di trabou na Hulanda,
diahuebs 6 di februari, Prome Minister Evelyn Wever-Croes a reuni cu señor Andy Lee.
Señor Andy Lee ta e miembro pa Aruba den Raad van State na Hulanda. Raad van State ta
atende entre otro cu leynan di Reino cu ta afecta Aruba tambe. Pa e motibo ey ta importante
pa Aruba tambe tin un miembro den Raad van State. Den e cuadro aki ora Prome Minister ta
na Hulanda, e ta reuni cu señor Lee pa dun’e updates di desaroyonan na Aruba y den e caso
aki pa prepara señor Lee pa e trayecto di e rijkswet cu ta na caminda. Aki ta trata di e rijkswet
tocante supervision financiero cu ta yuda pa Aruba por haya un interes mas abou riba e debe
di Covid.
Prome Minister: “Reunionnan cu señor Lee semper ta hopi informativo. Ami ta trece hopi
informacion y señor Lee di su banda tambe ta informa mi riba e desaroyonan na Hulanda. Tin
un gobierno nobo na Hulanda y ya pa algun luna caba, mas y mas nan ta duna di conoce kico
ta nan posicion. Pa e motibo aki e trabou di señor Andy Lee como miembro di Raad van State
ta hopi importante, ya cu e ta sigui e desaroyonan pa asina informa Gobierno riba esaki”.
Prome Minister ta indica cu a trata di un reunion hopi positivo y cu hopi informacion. Asina
Aruba ta prepara pa e trayecto cu ta bin si en caso finalisa e negosacionnan y e ley di Reino
(“Rijkswet”) wordo aproba pa Hulanda y tambe pa e gobierno nobo di Aruba y pa tur e
partidonan, pasobra na fin di dia e ta un punto hopi importante pa e pais.
“E ley di Reino ta un di e temanan principal di e reunionnan cu mi ta atende e dianan aki na
Hulanda. E negosacionnan ta andando y manera ta conoci, Hulanda a duna di conoce cu si
Aruba por cumpli cu cierto condicionnan, nan ta dispuesto pa baha e interes di e debe di 5.1%
cu e ta actualmente, pa 3.4%. Esey lo ta un “game changer” pa Aruba. Principalmente
mirando e echo cu Hulanda ta dispuesto tambe pa re-financia e debenan bieu di prome cu e
pandemia na e mesun interes di 3.4%. Si por logra esey tambe lo tin un espacio financiero aun
mas grandi, unda e gobierno nobo por haci inversionannan y duna bek na e comunidad”,
Prome Minister a menciona.