Cu un ambiente di hopi positivismo, entusiasmo y un energia renoba, Partido Pueblo Arubano (PPA) ta mirando cu gran optimismo e avance di e trabounan pa keda cla cu e cas di partido na San Nicolas. E Presidente di Directiva di PPA, Sr. Eddy Bennett, a expresa su contento y a duna un bista claro di e impacto cu e cambio di liderato y e trabou di e team ta teniendo den e organisacion y den e pueblo.
Energia Nobo y Meta pa Fin di Aña
Sr. Bennett a subraya cu for di momento cu e liderato nobo a asumi e stuur di e partido, e dinamica a cambia completamente, e la trece un energia enorme cu ta motivando tanto e militancia como e comunidad en general.
E cas di partido na San Nicolas, cual a keda cera y den un estado di abandono pa basta aña, ta den pleno proceso di restauracion. E meta principal ta keda pa e edificio ta completamente cla pa fin di aña, pero e ritmo di e trabounan ta permiti proyeccionnan ainda mas lihe.
“Nos tabatin como meta cu pa fin di aña aki nos kier keda cla cu e edificio. Sigur sigur nos kier tira un pagara aki dilanti. Pero manera cos ta bayendo, mi ta kere cu pa october of cuminsando november, ya caba nos por cuminsa opera y tene cierto actividadnan andando den dje,” Sr. Eddy Bennett a declara.
Campaña Limpi y un Plan Visionario: 2025–2050
E positivismo cu ta wordo sinti rond di e partido ta fruto di e estilo y plan cu PPA a presenta na pueblo. Sr. Bennett a resalta cu e partido a hiba un campaña limpi, sin atake personal, enfocando unicamente riba proyectonan clave cu ta di gran importancia pa hiba Aruba dilanti.
Aki a destaca e Plan 2025–2050, un mapa di ruta di largo plaso diseña pa desaroya e pais den tur su facetanan:
Vision di Largo Plaso: E plan ta enfoca riba e futuro di Aruba pa e proximo decadanan.
Meta di Gobernacion: E obhetivo ta pa e 5 representantenan di e team por drenta den gobernacion pa ehecuta tur e metanan aki na bienestar di e comunidad.
Porta Habri pa Tur cu Kier Construi Aruba
E renasemento di PPA a atrae hopi hende, profesionalnan y ciudadanonan cu kier aporta idea y tempo pa e reconstruccion di e pais.
“Nos tin hopi hende cu ta acercando nos, cu ta dispuesto pa yuda y cu tin bon idea. Nos a habri porta pa tur hende cu kier join nos, pasobra nan tur ta bon bini. Hunto nos ta bay traha pa construi Aruba bek,” e Presidente di Directiva a conclui.
E integracion di e trabou intensivo di reconstruccion fisico di e cas di partido hunto cu e liderato y structura directiva ta confirma e compromiso firme di PPA pa sigui sirbi e pueblo di San Nicolas y di Aruba completo.